Soňky 10 günüň dowamynda ilki Ispaniýanyň Şa Kubogy ýaryşynyň, soňra UEFA Çempionlar ligasynyň daşynda galan “Real Madrid” topary tälimçisini çalyşdy. 4 günde 2 “El Klasikoda” asgyn gelip, “La Ligada-da” çempionlykdan uzaklaşan “Real” ozalky tälimçisi Zinedin Zidany wezipä belledi.
Madridliler geçen ýylyň 31-nji maýynda wezipesini taşlan Zidan bilen 2022-nji ýylyň tomsuna çenli degişli şertnama baglaşdy. 2016-njy ýylyň 4-nji ýanwaryndan 2018-nji ýylyň 31-nji maýyna çenli “Realyň” tälimçisi bolan Zidan şol 2,5 ýyllyk döwürde topara 9 kubok (3 Çempionlar ligasy, 1 “La Liga”, 2 UEFA Super kubogy, 2 FIFA klublar arasy Dünýä Kubogy) gazandyrypdy.
Metbugatda çykan habarlara görä, toparyň prezidenti Florentino Perez Zidana transfer üçin 400 million funt sterling berer.Toparyň tomusky transfer möwsümini juda hereketli geçirmegine, Eriksen, Hazard, Mbappe ýaly oýunçylary transfer etmegine garaşylýar.