Ýewropada futbol möwsümi tamamlanyp, transfer möwsümine badalga berildi. Tomsuň ilkinji günlerinde eýýäm birnäçe ýyldyz futbolçy erkin agent ýagdaýynda tamamlanan möwsümde çykyş eden klublaryny terk etdiler. Esasan hem Çempionlar Ligasynyň çempiony “Real Madridiň”, şol sanda “Mançester Ýunaýted”, “Ýuwentus”, “Inter”, “Bawariýa” ýaly öňdebaryjy klublaryň ýyldyz oýunçylary bir-birden klublaryndan gaýdýarlar.
“Real Madrid” bilen başlasak, eýýäm 3 ýyldyz oýunçysy klubdan aýryldy.Olar toparyň ençeme ýyllyk kapitany, braziliýaly çep gyraky goragçy Marselo 2007-nji ýylyň ýanwaryndan gapysyndan ilkinji ädimini äden klubundan 14,5 ýyldan soň gidýär.
Ol şol 15 ýyla golaý döwürde 25 kubok gazanýar we klubuň rekordyny goýýar.Marselodan soň uelsli Garet Beýl, şol sanda ispaniýaly Isko “Real Madriddäki” 9 ýyllyk başdan geçirmeleriniň tamamlanandygyny habar berdiler.
Birnäçe ýyldyz oýunçysynyň şertnamasyny täzelemedik esasy klublaryň ýene biri “Mançester Ýunaýted” bolup, fransiýaly Pol Pogba (2016 2022), ispaniýaly Huan Mata (2014 2022), serbiýaly Nemanýa Matiç (2017 2022), angliýaly Jessi Lingard (2011 2022), şol sanda urugwaýly Edinson Kawani (entek resmi mälim edilmedi) ýaly oýunçylar bilen ýoluny aýyrdy.
Toparyň täze tälimçisi Erik ten Hagyň ýolbaşçylygynda täzeçe düzüm düzmegine garaşylýar.
“Mançester Ýunaýtediň” şäherdeşi “Mançester Siti” hem häzirlikçe braziliýaly ýarymgoragçysy Fernandinionyň klubdan gidendigini resmi ýagdaýda mälim etdi. Şertnamasy tamamlanan ýyldyz oýunçy 2013-nji ýyldan bäri Mançester şäheriniň gök tarapynyň köýnekçesini geýip gelýärdi.
“Ýuwentusdan” Paulo Dibala hem şertnamasy uzaldylmadyklaryň hataryna goşuldy. Oýunçynyň “Intere” ýa-da “Roma” geçmegine garaşylýar. Dibala 2015-nji ýylda kluba gelipdi. Giorgi Kiellini hem 18 ýyllyk “Ýuwentus” karýerasyny tamamlady. Şol sanda 2017-nji ýylda turinlileriň düzümine goşulan Federiko Bernardeski hem “Ýuwentusdan” gaýtdy.
“Milandan” Frank Kessi klubdaky 5 ýyllyk karýerasyny tamamlandygyny aýtdy. Kot-d’Iwuarly ýarymgoragçy “Milan” bilen aýlyk hakyny az göreni üçin şertnamasyny uzaltmady. Onuň Barselonanyň düzümine goşulmagyna garaşylýar. Italiýaly goragçy Alessio Romanýoliniň hem şertnamasy häzirlikçe uzaldylmady. Oýunçynyň Rim şäheriniň bir kluby bilen şertnama baglaşmagyna garaşylýar.
“Inter” horwatiýaly wingeri, 33 ýaşyndaky Iwan Perişiçiň hem şertnamasyny uzaltmady. Perişiç eýýäm “Tottenham” bilen 2 ýyllyk şertnama hem baglaşdy.
“Bawariýa” topary hem fransiýaly oýunçysy Kolentin Tolissonyň klubdan gidýändigini habar berdi.