Golaýda haklaşyk duşuşygyny geçiren britaniýaly Taýson Fýuri bilen amerikaly Deonteý Waýlderiň haýal etmän 3-nji gezek hem duşuşjakdygy habar berildi.Olar şu ýylyň 18-nji iýulynda ýene bir ýola Las Wegasdaky “MGM Garden Arenada” tutluşyk geçirerler.
Mälim bolşy ýaly, olaryň arasyndaky 2018-nji ýylda guralan 1-nji duşuşyk deňlikde tamamlanypdy.Golaýda geçirilen 2-nji duşuşykda Fýuri güýçli garşydaşyny 7-nji raundda tehniki nokaut bilen ýeňipdi.
Britaniýaly boksçy Entoni Joşua nobatdaky duşuşygyny bolgariýaly Kubrat Pulew bilen geçirer. Agyr agramda WBA (Super), IBF, WBO, IBO ugurlary boýunça geçiriljek bu tutluşyk şu ýylyň 20-nji iýunynda Londondaky “Tottenham Hotspur” stadionynda guralar. 30 ýaşly Joşua häzirki wagta çenli 24 tutluşygynyň diňe birinde ýeňlişe sezewar boldy. 38 ýaşly Pulew bolsa 29 duşuşyk geçirip, birinde asgyn geldi.
Russiýaly boksçy Aleksandr Powetkin bilen britaniýaly Dillian Waýt WBC-niň superagyr agram derejesiniň çempionlyk guşagy ugrunda özara duşuşar. Şu ýylyň maý aýynyň 2-sinde boljak tutluşyk Angliýanyň Mançester şäherindäki “Mançester Arenada” geçiriler. 40 ýaşly Powetkin şu wagta çenli 38 duşuşykda 35 gezek ýeňiş gazanyp, 2-sinde utuldy. 31 ýaşly Waýt 28 duşuşygyň 27-sinde garşydaşlaryny ýeňlişe sezewar edip, birinde-de asgyn geldi.