Italiýanyň çempionaty “Serie A-nyň” soňky 8 ýylynyň çempiony “Ýuwentus” Massimiliano Allegriniň ornuna “Çelsiniň” italýan tälimçisi Maurizio Sarrini wezipä belledi. “Goja Sinýoralylar” 60 ýaşyndaky tälimçi bilen 3 ýyllyk şertnama baglaşdy. “Çelsi” toparyna Ýewropa ligasyny gazandyran Sarri Italiýada “Napoli”, “Empoli”, “Grosseto”, “Perujia”, “Hellas Werona”, “Awellino”, “Peskara” toparlarynda-da tälimçi bolup işläpdi. “Ýuwentusyň” ozalky tälimçisi Massimiliano Allegri bolsa, 1 ýyl dynç aljakdygyny habar berdi. Şeýle-de “Çelsi” toparyna tälimçilige Frank Lampardyň wezipä bellenmegine garaşylýar.
Italiýanyň başga uly kluby “Milan” hem täze tälimçisi barada habar berdi. Şunlukda, Jennara Gattusonyň ornuna Marko Jampaolo toparyň täze tälimçisi boldy. 51 ýaşly hünärmen “rossonerililer” bilen 2+1 ýyla niýetlenen şertnama gol çekişdi. 3 ýyldan bäri “Sampdoriýanyň” tälimçisi wezipesinde işleýän Jampaolo “Empoli”, “Breşia”, “Çesena”, “Kataniýa”, “Siena”, “Kaliari”, “Askoli” ýaly klublara tälim berdi. “Milan” golaýda ozalky ýyldyzlary Paolo Maldini bilen Zwonomir Bobany hem ýokary wezipeli ýolbaşçylyga belläpdi.
Ispaniýanyň milli ýygyndysynyň tälimçisi Luis Enrike maşgala ýagdaýy sebäpli wezipesini taşlady.Bary-ýogy 11 aý topara tälim beren Enrike milli ýygyndynyň golaýda geçiren oýunlaryna-da gatnaşmandy.
Topara onuň ornuna wagtlaýynça Roberto Morena tälim berer.Ispaniýanyň ýygyndysy EURO 2020-niň saýlama tapgyrynda “F” toparçada Şwesiýanyň, Rumyniýanyň, Norwegiýanyň, Maltanyň, Farer adalarynyň ýygyndylary bilen özara güýç synanyşýar.
Olar häzirki wagtda 4 oýunda 12 utuk toplamagy başardy.