Şu gün Türkmenistanyň Mejlisinde nusgawy türkmen şahyry Magtymguly Pyragynyň doglan gününiň 300 ýyllygy mynasybetli ýurduň kanunçykaryjy edarasynyň wekillerine we başga-da birnäçe döwlet edaralarynyň ýolbaşçylaryna hem-de işgärlerine Türkmenistanyň Magtymguly Pyragynyň 300 ýyllygyna atly ýubileý medaly we ýadygärlik nyşanlary bilen sylaglamak dabarasy geçirildi. Bu barada Mejlisiň resmi saýtynda habar berildi.
Dabarada Pähim-paýhas ummany Magtymguly Pyragy ýylynda Magtymguly Pyragynyň ömrüne we döredijiligine bagyşlanan çäreleriň geçirilmeginiň dünýäde ynsanperwer hyzmatdaşlygy has-da ösdürmekde, dost-doganlygy berkitmekde, halklaryň arasyndaky gatnaşyklary täze derejä çykarmakda, ylmyň, medeniýetiň we jemgyýetiň öňündäki meseleleri çözmekde giň mümkinçilikleri açýandygy bellenip geçildi.
Dabara gatnaşyjylar özleriniň zähmetine berlen ýokary baha üçin tüýs ýürekden hoşallyklaryny beýan etmek bilen, ýurduň kanunçylyk binýadyny kämilleşdirmekde Gahryman Arkadagyň, Prezident Serdar Berdimuhamedowyň alyp barýan syýasatyny halkyň arasynda giňden wagyz etmekde ähli tagallalary etjekdiklerine ynandyrdylar.