Ysraýylyň harby güýçleriniň gabaw astyndaky Gaza sektorynda guran soňky hüjümlerinde aralarynda çagalar hem bolan 22 palestinalynyň ýogalandygy we köp sanda adamyň ýaralanandygy mälim edildi.
Palestinanyň resmi habarlar agentligi WAFA tarapyndan berilen habarlarda, Ysraýylyň Han Ýunus şäheriniň günortasyna, günbataryna we bosgun düşelgelerine hüjümler gurandygy aýan edildi.
Hüjümde Han Ýunus şäheriniň Mikdad, An-Nejjar we Al-Amudi maşgalalaryndan 20 adamyň ýogalandygy, köp sanda adamyň ýaralanandygy bellenen habarda, ýogalanlaryň arasynda çagalaryň hem bardygy habar berildi.
Gaza sektorynyň Deýr al-Beleh sebitinde hem Ysraýylyň hüjümleriniň netijesinde Fetair maşgalasyndan 2 çaganyň ýogalandygy beýan edildi.
Gazadaky hökümet tarapyndan düýn agşam berilen beýanatda Ysraýylyň gabawy astyndaky Gaza sektorynda 7-nji oktýabrdan bäri dowam edýän hüjümlerde ýogalanlaryň sanynyň aglabasy zenanlardan we çagalardan ybarat bolmak bilen 18 müň 412 adama, ýaralananlaryň sanynyň bolsa 50 müň 100 adama ýetendigi mälim edilipdi.
Hamasyň harby şahasy Kassam topary 7-nji oktýabrda Ysraýyla garşy "Aksa Tupany" ady bilen giň göwrümli hüjüm başladandygyny habar beripdi.
Ysraýylyň goşuny hem şoňa jogap hökmünde harby uçarlary bilen Gaza sektoryna "Demir Gylyçlar" ady bilen operasiýa başladandygyny beýan edipdi.