Palestinanyň Saglygy goraýyş ministrliginden berilen ýazmaça beýanatda, şu gün irden Ysraýylyň basyp alyjy güýçleriniň Jenin şäherindäki hüjümlerinde 3 adamyň ýogalandygy habar berildi.
Beýanatda ýogalan adamlar barada jikme-jik maglumat berilmedi.
Sebitdäki şaýatlaryň beren maglumatyna görä, Jenin şäherinde ysraýylly esgerler bilen olara garşylyk görkezen palestinalylaryň arasynda çaknyşyk boldy. Ysraýylly esgerleriň palestinalylara degişli ulaglara od açmagy netijesinde ençeme adam ýaralandy.
Beýleki tarapdan beýannama beren Yslam Jihad hereketiniň harby ganady Iýerusalim Seriýýe topary, Jenin bosgun düşelgesiniň töwereginde basyp alyjy güýçlere ýaragly ýagdaýda garşylyk görkezýändiklerini we käbirlerini ýaralandyklaryny beýan etdi.
Ysraýylyň goşunyndan berilen ýazmaça beýanatda bolsa, ysraýylly esgerleriň Günbatar Şerianyň Jenin, Ramallah, Nablus we Al Halil şäherlerinde operasiýa geçirendikleri mälim edildi.
Şolarda terror we howpsuzlyk jenaýatlary bilen baglanşykly şübhe astynda bolan 15 adamyň göz tussaglygyna alynandygy aýan edildi.
Ysraýylyň goşunyndan berilen beýanatda, Jenin şäherindäki wakada öldürilen 3 palestinaly barada bolsa maglumat berilmedi.
Şu ýylyň başyndan bäri Günbatar Şeria sebitinde her gün diýen ýaly operasiýalar geçirýän Ysraýylyň harby güýçleri, şol hereketlerinde ýygy-ýygydan asuda ilatly pesltinalylary nyşana alýar.
BMG tarapyndan berilen maglumata görä BMG-nyň 2005-nji ýyldan bäri sebiti hasaba almagyndan bäri 2022-nji ýyl Günbatar Şeriada iň ganly ýyl hökmünde bellige alyndy.
Şoňa laýyklykda 2022-nji ýylyň 29-njy noýabryna çenli 153-i Günbatar Şeriada, 52-si Gazada bolmak bilen jemi 205 palestinaly öldürildi. Şol adamlaryň 47-si çagalardan ybarat.