Gresiýanyň Olimpiakos kluby Ýewropanyň Konferensiýalar ligasynyň ýarym finalynyň jogap oýnunda Angliýanyň Aston Willasyny 2:0 hasabynda ýeňlişe sezewar etdi hem-de ýaryşyň finalyna ýollanma aldy. Oýun Pireý şäherinde geçirildi.
Duşuşykdaky gollaryň ikisi hem Aýub El-Kaabi (10, 79) tarapyndan derwezä gönükdirildi. Toparlaryň arasyndaky Birmingemde geçirilen deslapky oýun hem 2:4 hasabynda Olimpiakosyň peýdasyna tamamlanypdy.
Olimpiakos finalda Italiýanyň Fiorentina topary bilen güýç synanyşar. Fiorentina ýarym finalda Belgiýanyň Brýugge toparyny iki oýnuň jemine görä (3:2, 1:1) ýaryşdan çykardy.
Ýaryşyň şu ýylky finaly 29-njy maýda Afina şäherinde geçiriler.
Ýeri gelende bellesek, Olimpiakos UEFA tarapyndan geçirilýän Ýewropanyň klublarynyň arasyndaky ýaryşlarda finala çykan ikinji grek klubudyr. Mundan ozal Panatinaikos 1971-nji ýylda Ýewropanyň çempionlarynyň kubogynyň (häzirki ÝÇL) finalynda Niderlandlaryň Aýaksy bilen duşuşyp, 2:0 hasabynda asgyn gelipdi.