Geçen gije Ýewropanyň Çempionlar ligasynyň 1/8 finalynda ahyrky duşuşyklar geçirildi. Olarda Ýuwentus Wilýarrealy, Lill bolsa Çelsini kabul etdi.
Italiýada geçirilen duşuşykda Wilýarreal myhmançylykda Ýuwentusy 3:0 hasabynda utdy. Şeýlelikde, bu ýeňiş ispan toparyny ýaryşyň çärýek finalyna çykardy.
78-nji minudyna çenli gol geçirilmedik duşuşygyň şol minudynda Žerar Moreno 11 metrlik jerime urgusyndan dürs peýdalanyp, Wilýarrealy öňe geçirdi.Bu gol myhman toparyň futbolçylaryna goşmaça güýç berdi. 85-nji minutda Pau Torres Ýuwentusyň derwezesinden ýene bir pökgini geçirdi.
Duşuşykdaky üçünji pökgini ýene-de 11 metrlik jerime urgusyndan Arno Gruneweld geçirdi. Şeýlelikde Ýewropa ligasynyň kuboklarynyň birnäçesini gazanan tälimçi Unai Emeri häzirki topary ― Wilýarreal bilen yklymyň birinji derejeli ýaryşynyň hem çärýek finalyna çykdy.
Wilýarreal Ýuwentusy iki duşuşygyň netijesinde 4:1 hasabynda ýeňdi.
1/8 finaldaky ilkinji duşuşykda öz meýdanynda Lilli 2:0 hasabynda ýeňen Çelsi düýn gije Fransiýada geçirile jogap duşuşygynda hem 2:1 hasabynda ýeňiş gazanyp, çärýek finala çykan ahyrky topar boldy.
Lill 38-nji minutda türkiýeli hüjümçi Burak Ýylmazyň dürs ýerine ýetiren 11 metrlik jerime urgusy bilen öňe saýlanan hem bolsa, bu üstünligini bary-ýogy 10 minut gorap bildi.Birinji ýarymyň goşmaça wagtynyň 3-nji minudynda Çelsi Kristian Pulisiçiň tapawutlanmagynda hasaby deňledi.
Iňlis toparyna ýaryşyň çärýek finalyna çykmak üçin şu deňlik hem ýeterlik bolup bilerdi, ýöne Çelsi 71-nji minutda bu oýundaky ýagdaýy hem öz haýryna üýtgetdi. Şol minutda Sesar Aspilikueta iňlis toparynyň duşuşykdaky ikinji goluny geçirdi. Şeýlelikde, Çelsi iki duşuşygyň netijesi boýunça Lilli 4:1 hasabynda ýeňip, çärýek finala çykdy.
Çelsiniň UEFA-nyň Çempionlar ligasynyň häzirki çempionydygyny ýatladýarys.
Şeýlelikde, çärýek finala Angliýa bilen Ispaniýanyň her haýsyndan üç, Germaniýa bilen Portugaliýadan bir topar çykdy. Çärýek finalda Angliýa Liwerpul, Mançester Siti we Çelsi, Ispaniýa Atletiko Madrid, Real Madrid we Wilýarreal, Germaniýa Bawariýa, Portugaliýa bolsa Benfika wekilçilik eder. Çärýek final duşuşyklarynyň bijeleri ertir ― 18-nji martda çekiler.
Ilkinji duşuşyklar 5-njiwe 6-njy aprelde, jogap duşuşyklary 12-nji we 13-nji aprelde geçiriler.