Golaýda dürli elektron enjamlaryny we aragatnaşyk tehnologiýalaryny öndürýän “Fujitsu” kompaniýasy “UH-X” we “UH-X Convertible’ atly iki sany täze ýankompýuterini tanyşdyrypdy.Indi bolsa ýapon kompaniýasy meşhur “LifeBook U9” seriýasyna “U94/A” hem-de “U9313X” atly iki sany iş noutbugyny goşandygyny mälim etdi.
Bu täze modeller 13-nji nesil mikroprosessorlar bilen enjamlaşdyrylypdyr.Kompýuterleriň kämil mikroprosessorlary ulanyjylar üçin köp amatly aýratynlygy hödürleýär.
“LifeBook U94/A” modeliniň agramy bary-ýogy 898 gram bolup, ululygy 14 dýuým.Näzik we ýuka bolmagy bilen bilen tapawutlanýan ýankompýuteriň durulygy 1920×1200 piksel.Ekranynyň ölçegi 16:10 bolup, “Ethernet” girişi, iki sany USB A girişi, bir sany “Thunderbolt 4” girişi hem-de HDMI 2.0 girişi göz öňünde tutulypdyr. Şeýle hem döwrüň talaby bolan ýokary tizlikli internet arabaglanyşygy bolan 5G 2 hem-de Wi-Fi 6E bilen üpjün edilipdir.
Noutbugyň öň tarapynda giň burçly kamera hem bar.
Beýleki model bolan “LifeBook U9313X” ekranynyň ölçegi 16:9 bolup, 1920×1080 piksel durulygy bilen tapawutlanýar. Ekrany 13,3 dýuýmlyk ululygynda bolan ýankompýuteri hem noutbuk, hem planşet hökmünde ulanyp bolýar. Ýankompýuteriň ekrany 360 dereje aýlanýar. Ýankompýuter iki sany USB A girişi, iki sany “Thunderbolt 4” girişi we “Ethernet” girişi bilen üpjün edilipdir.
“LifeBook U94/A” 2 müň 290 dollardan, “LifeBook U9313X” 2 müň 300 dollardan satuwa çykaryldy.
Sülgün GUWANÇGELDIÝEWA, Türkmenistanyň Oguz han adyndaky Inžener-tehnologiýalar uniweristetiniň talyby.