Futbol boýunça Katar 2022 Dünýä Kubogynyň finalynda Argentina bilen Fransiýanyň ýygyndylary duşuşdy.Lusail şäherindäki “Lusail Iconic” stadionynda oýnalan finala polşaly Simon Marçiniak eminlik etdi.Duşuşyga 88 müň 966 janköýer gatnaşdy.
Duşuşygyň 23-nji minutynda Lionel Messi penaltiden tapawutlanyp, hasaby açdy. 36-njy minutda Anhel Di Mariýa hasaby 2-ä çykardy.Duşuşygyň tamamlanmagyna 10 minut galanda (80-nji minut) emin ýene bir penalti urgusyny belledi.
Bu gezek fransuzlaryň peýdasyna bellenen bu urgyny Kilian Mbappe dürs ýerine ýetirdi.Bu goldan 2 minut soň ýene Mbappe tapawutlanyp hasaby deňledi. Şeýlelikde, duşuşygyň esasy wagty 2-2 deňlikde tamamlanyp, goşmaça 30 minut oýnalmaly boldy.
Goşmaça wagtyň 1-nji 15 minuty golsuz tamamlandy. 109-njy minutda super ýyldyz Lionel Messi argentinleri täzeden öňe çykardy. Ýöne 118-nji minutda Marçiniak ýene bir penaltini Argentinanyň derwezesiniň alkymynda belledi.
Ony-da Kilian Mbappe dürs urup, çempionatdaky 8-nji goluny geçirip, ýene bir ýola hasaba deňledi.Galan minutlarda Fransiýa ýene bir amatly pursatda öňe saýlanyp bilerdi. Ýöne Kolo Muaniniň urgusyny derwezeçi Martines saklamagy başardy.
Şunlukda, penalti urgularyna Fransiýa başlap, Mbappe takyk ýerine ýetirdi.Messi hem ýalňyşsyz urdy.Komanyň urgusyny derwezeçi Martines saklady.Dibala penaltilerde argentinleri öňe saýlady.Tçuameniniň urgusy meýdançanyň daşyna gitdi.
Paredes argentinleriň 3-nji urgusyny dürs urdy.Fransiýadan Kolo Muani dürs urup, toparyny umytlandyrsa-da, Montiel soňky urguny takyk ýerine ýetirip, penaltileriň netijesinde 4-2 öňe saýlandy.Netijede, esasy wagty 2-2, goşmaça wagtda 3-3 bolan duşuşygyň netijesinde penaltilerde 4-2 öňe saýlanan Argentinanyň ýygyndysy 36 ýyldan soň 3-nji çempionlygyny gazandy.
Argentinanyň ýygyndysy 1978-nji we 1986-njy ýyllardan 3-nji sapar Dünýäniň çempiony bolmagy başardy.Tangoçylar 1930-njy, 1990-njy hem-de 2014-nji ýyllarda-da ýeňlişe sezewar bolupdy.
Şeýlelikde, dünýäniň iň uly 2 super ýyldyzynyň biri hasaplanýan Lionel Messi karýerasyndaky iň uly kubogy gazanyp, kubok kolleksiýasyny tamamlady.
Messiniň täze rekordlary
Duşuşykda 1 gol geçiren Lionel Messi Dünýä Kubogynda 26-njy oýnuny geçirip, bu ugurda Lotar Matteusyň 24 ýyllyk rekordyny täzeledi. Şeýle-de, ol Dünýä Kubogynda iň köp wagt çykyş eden futbolçy bolup, bu babatda-da 2217 minut çykyş eden Paolo Maldininiň rekordyny öz adyna geçirdi.
Ol bu duşuşykdan öň Maldiniden 24 minut az oýnapdy. Şeýle-de, Messi 19-njy duşuşygynda kapitan hökmünde meýdança çykyp, bu ugurda-da öz rekordyny täzeledi.Meksikaly Rafael Markes 17, Diego Maradona 16 oýun bilen 2-3-nji orunlary paýlaşýarlar.
Fransiýa taryhy ýeňiş başartmady
1966-njy ýyldan bäri ilkinji ýarymy takyk urgusyz tamamlan ilkinji ýygyndy bolan Fransiýanyň ýygyndysy Italiýadyr (1934, 1938) Braziliýadan (1958, 1962) soň kubogy yzly-yzyna gazanan 3-nji topar bolmak mümkinçiligini elden giderdi. Didie Deşama bolsa, italiýaly Wittorio Pozzodan soň kubogy 2 gezek alan 2-nji tälim bolmak başartmady.
1966-njy ýyldan soň finaldaky ilkinji het-trik
Finalda 3 gol geçirip, çempionatyň iň netijeli oýunçysy bolan Kilian Mbappe Dünýä Kubogynyň finalynda het-trik eden 2-nji futbolçy boldy. Ondan öň 1966-njy ýylyň finalynda angliýaly Jeoff Hörst het-trik edipdi.
Argentina: E. Martines Molina (Montiel 90+1), Otamendi, Romero, Taliafiko (Dibala 120+1) De Paul (Paredes 102), E. Fernandes, Mak Allister (Pezzella 117) Di Mariýa (Akunýa 64), Messi, H. Alwares (Lau. Martines 102); Lionel Skaloni
Fransiýa: Lloris Kunde (Disasi 120+1), Waran (Konate 113) , Apamekano, T. Hernandes (Kamawinga 71) Tçuameni, Rabio (Fofana 96) Mbappe, Grizmann (Koman 71), Dembele (Kolo Muani 41) Žiru (Turam 41); Didie Deşam