Günüň 2-nji çärýek final duşuşygynda-da Dünýä Kubogynyň nusgawy duşuşyklaryna öwrülen iki ýygyndynyň arasyndaky nobatdaky duşuşyk bolar.Aşgabat wagty bilen 00:00-da başlanjak bu duşuşykda Niderlandlar bilen Argentinanyň ýygyndylary duşuşar.
Duşuşyk Lusail şäherindäki “Lusail Iconic” stadionynda oýnalar.Oýna ispaniýaly Antonio Mateu Laos eminlik eder.Bu duşuşyk 2 ýygyndynyň arasyndaky 10-njy duşuşyk bolar.Mundan öňki oýunlarda Niderlandlar 4, Argentina 1 gezek ýeňiş gazanyp, 4 oýun deňlikde tamamlandy.
Mundan öň Dünýä Kubogynda 5 gezek duşuşdylar
Iki topar şu wagta çenli Dünýä Kubogynyň çäginde 5 gezek gabatlaşdylar. Şolaryň ilkinjisinde, 1974-nji ýylda Niderlandlar Ýohan Kroffuň 2 gol geçiren oýnunda 4-0 hasabynda ýeňiş gazanypdy. 4 ýyldan soň 1978-nji ýylda finalda duşuşan iki toparyň bu gezekk oýnunda Argentina goşmaça wagtda 3-1 hasabynda ýeňiş gazanyp, ilkinji gezek çempion bolupdy.
Toparlar 3-nji gezek Fransiýa 1998-de duşuşdylar. Bu gezekki ýaly çärýek finalda gabatlaşan 2 ýygyndynyň şol duşuşygy dartgynly geçip, Niderlandlar Numan, Argentinadan Ortega gyzyl kart alypdy. Netijede, Niderlandlar Bergkampyň 90-njy minutdaky goly bilen 2-1 hasabynda ýeňiş gazanypdy.
Toparlar 2006-njy ýylda Germaniýadaky çempionatda bir toparça düşüpdiler. Duşuşyk çekeleşikli geçse-de hasap açylmandy.
Olaryň 5-nji duşuşygy 2014-nji ýylda Braziliýada geçirilen çempionatda bolup, ýarym finalda duşuşan 2 ýygyndynyň şol oýnunda esasy we goşmaça wagtda hasap açylmandy. Penaltileriň netijesinde, Argentina 4-2 öňe saýlanyp, adyny finala ýazdyrypdy.
Şu gijeki duşuşykda toparlaryň esasy düzümleri bilen meýdança çykmagyna garaşylýar. Argentinada toparyň esasy ýarymgoragçysy De Paulyň azda-kände şikesi bolup, onuň oýnap-oýnamajakdygy duşuşygyň öňüsyrasynda belli bolar. Umumylykda, Argentina Lionel Messä, Niderlandlar bolsa Wan Deýke uly ynam bildirýär.