Ukrainanyň Döwlet baştutany Wladimir Zelenskiý, Ukrainanyň paýtagty Kiýew şäherine baran Germaniýanyň Prezidenti Frank-Walter Ştaýnmaýer bilen duşuşyk geçirdi.
Prezident Ofisinde metbugata ýapyk häsýetde geçen ikiçäk duşuşykdan soň geçirilen umumy metbugat ýygnagynda Wladimir Zelenskiý, howpsuzlyk, ykdysadyýet, sosial galkynyş ugurlarynda Ýewropa Bileleşigi we BMG-nyň garamagynda Ukraina bilen edýän hyzmatdaşlygy üçin Germaniýa minnetdarlyk bildirdi.
Ikiçäk duşuşykda taraplaryň ikisi üçin hem ähmiýetli bolan meseleleri ele alandyklaryny aýdan Zelenskiý, ýurdunda Russiýa garşy söweşiň dowam edýändigini ýatladyp, Ukrainanyň asmanynynyň goralmagy üçin IRIS-T howa goranyş ulgamlaryny beren Germaniýa minnetdardyklaryny, şol goldawyň dowam etmegini umyt edýändiklerini beýan etdi.
Howa goranyş ulgamlary ýaly beýleki goranyş maksatly ýaraglarada zerurlyklarynyň bardygyny we şol ugurda Germaniýa tarapyndan goldaw isländiklerini aýdan Zelenskiý: "Olar esasan hem artilleriýa ulgamlaryndan, sowutly ulaglardan we beýleki ýaraglardan ybaratdyr" diýip mälim etdi.
Rus hüjümleri sebäpli zyýan ýeten Çernigow sebitindäki infrastrukturanyň abatlaýyş işleriniň Ştaýnmaýeriň şahsy hemaýatkärliginde geçirilmegi barasynda karara gelendiklerini aýdan Zelenskiý, degişli umumy jarnamanyň hem gol çekilendigini aýan etdi.
Wladimir Zelenskiý ýurdunyň ÝB bilen tizleşdirilen integrasiýa tapgrynyň dowam edýändigini, şol ugurda Ukraina hökmünde kabul eden ähli jogapkärçilikleri, ýylyň ahyryna çenli ýerine ýetirjekdiklerini habar berdi.