7-nji noýabrda AFK-nyň Çempionlar ligasynda jogapkärli duşuşyk geçiren Ahal bary-ýogy bir günlük arakesmeden soňra Ýokary ligada duşuşyga çykar.
Topar ertir ― 9-njy noýabrda Mary şäherinde ýerli Energetik bilen 10-njy tapgyryň galdyrylan duşuşygyny geçirer. Türkmenistanyň Futbol federasiýasy bu duşuşygyň Energetik stadionynda geçiriljekdigini we onuň sagat 15:30-da başlanjakdygyny habar berdi.
Duşuşyga paýtagtly N.Garajaýewiň ýolbaşçylygyndaky topar eminlik eder.
Yzda galan 21 tapgyrda 16 duşuşyk geçiren Ahalyň 20 utuk bilen altynjy orunda barýandygyny ýatladýarys. Soňky iki tapgyrdan bäri üstünlikli oýny orta goýup gelýän Energetigiň bolsa 18 duşuşykda 16 utugy bar. Ahal bilen Energetik ýaryş tertibinde goňşy.
10-njy tapgyryň beýleki duşuşyklarynda Köpetdagyň myhmançylykda Şagadamy, Altyn asyryň hem myhmançylykda Nebitçini şol bir hasap ― 1:0 hasabynda ýeňendigini ýatladýarys. Paýtagtda geçirilen Aşgabat ― Merw duşuşygy bolsa 2:2 hasabyndaky deňlik bilen tamamlanypdy.