14 — 16-njy noýabr aralygynda Türkmentel — 2024 atly XVII halkara sergi hem-de ylmy maslahaty geçiriler.
Foruma birnäçe halkara guramalaryň, önüm öndüriji we programma üpjünçiligini taýýarlaýan kompaniýalaryň 150-den gowragynyň ýolbaşçylarynyň we wekilleriniň, halkara sergä bolsa daşary ýurtly we ýerli kompaniýalaryň 60-dan gowragynyň gatnaşmagyna garaşylýar.
Bu kompaniýalar sergide sanly ykdysadyýet, kiberhowpsuzlyk, maglumat goraglylygy, telekommunikasiýa, maglumat we kompýuter tilsimatlary, hemra aragatnaşyk ulgamynyň enjamlary, öýjükli aragatnaşygyň 5G ülňüleri ýaly ugurlarda gazanylanlar bilen tanyşdyrarlar. Şeýle hem forumyň çäklerinde Türkmenaragatnaşyk agentligi we Bütindünýä poçta birleşigi bilen bilelikde Poçta ulgamyndaky sanly geçiş atly okuw maslahatyny geçirmek meýilleşdirilýär. Çäräniň çäklerinde Sanly çözgüt — 2024 atly innowasion taslamalaryň nobatdaky bäsleşiginiň jemi jemlener we onuň ýeňijilerini sylaglamak dabarasy bolar.
Bu barada 1-nji noýabrda geçirilen sanly ulgam arkaly Ministrler Kabinetiniň mejlisinde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew hasabat berdi.