“Türkmennebit” döwlet konserni 2013-nji ýyldan bäri öz potratçylarynyň biri Kipriň I.C. Intercomplect Ltd. kompaniýasy bilen hasaplaşyp bilmän gelýär. Bu barada, CIS Debt Recovery Solutions hukuk firmasyna salgylanyp, TAH neşiri habar berýär.
2017-nji ýylyň noýabrynda habar berilmegine görä, berginiň möçberi $8,5 milliona barabar.
Kipr kompaniýasynyň bähbitlerini goraýan CIS Debt Recovery Solutions firmasynyň wekili Taras Kopiniň sözlerine görä, “Türkmennebit” 2018-nji ýylyň aprelinde umumy bergisiniň möçberiniň 15 prosentini töledi, emma töleg şu ýerde hem saklandy.
“Türkmennebitiň” başlygy Döwletgeldi Hajyýew sentýabryň ortasynda I.C.
Intercomplect Ltd.kompaniýasyna resmi hat ýollap, döwlet konserniniň “2013-nji ýyldaky şertnama esasynda iberilen enjamlar babatda boýun alan borçlarynyň ählisini tölejekdigine” ynandyrdy.
Möhletler, tölegiň gijikdirilmeginiň sebäpleri agzalmaýar.
TAH-yň Türkmenistanyň ykdysady blogundaky çeşmelerine salgylanyp ýazmagyna görä, “iýul-awgust aýlaryndan bäri Türkmenistanyň ýangyç-energiýa toplumynda diňe Türkmenşydaky nebiti gaýtadan işleýän zawodda (TNGIZ) pul galdy. Beýleki konsernleriň ählisi: “Türkmengaz”, “Türkmennebit” we “Türkmengeologiýa” çökerildi”.
Çeşmäniň düşündirmegine görä, “Türkmennebit” bergisiniň 15 prosentini tölemek üçin hökümet başlygynyň tutuş ýangyç-energetika toplumyna gözegçilik edýän orunbasaryna, TNGIZ-iň “Türkmennebitiň” hasabyna zerur möçberdäki serişdäni geçirmek barada görkezme bermegi üçin, hat bilen ýüzlendi.