Halkara Migrasiýa guramasynyň (HMG) wekilhanasy we ÝHHG-nyň Aşgabatdaky merkezi 16-17-nji awgustda Türkmenistanda ýolagçylar hakyndaky deslapky maglumatlar ulgamyny (API) ornaşdyrmak boýunça seminar geçirdi.
API arkaly ýolagçynyň pasportundaky maglumatlar we reýs baradaky maglumatlar awiakompaniýa tarapyndan toplanyp, gürrüň edilýän uçar uçmanka ýa-da barjak ýerine barmanka, degişli ýurtlaryň serhedinde ýerleşýän milli organlara geçirilýär.
Bu maglumatlary aýdaly, Interpol ýaly hukuk goraýjy organlaryň gözegçilik sanawy bilen deňeşdirmek arkaly serhet organlaryň işgärleri daşary ýurtly söweşiji-terrorçylaryň ýa-da beýleki şübheli şahslaryň öz ýurtlaryna geljek bolup synanyşýandygyny ýa-da däldigini anyklaýarlar.
Bu çärä Türkmenistanda ýolagçylar baradaky maglumatlary işläp-taýýarlaýan agentlikleriň 15-siniň, şol sanda Döwlet migrasiýa gullugynyň, Döwlet gümrük gullugynyň, Döwlet serhet gullugynyň, Içeri işler ministrliginiň, Baş prokuraturanyň wekilleri gatnaşdy diýip ÝHHG-nyň Aşgabatdaky edarasy habar berýär.
Şeýle-de, ÝHHG-nyň mobil okuw topary 14-16-njy awgustda daşary ýurtly söweşiji-terrorçylary ýüze çykarmak boýunça Türkmenistanyň serhet we migrasiýa gulluklary üçin Aşgabatda interaktiw kurs gurnady.
— Häzirki pursatda yzyna dolanýan daşary ýurtly söweşiji-terrorçylaryň şahslaryny, bolýan ýerlerini, akymyny anyklamak halkara jemgyýetçiligi üçin ileri tutulýan meseleleriň biri bolup durýar diýip, ÝHHG-nyň Aşgabatdaky merkeziniň başlygynyň wezipesini wagtlaýyn ýerine ýetirýän Nataşa Raşiç belledi.