Türkmenistanyň Belgiýadaky, Niderlandlar Patyşalygyndaky we Lýuksemburg Beýik Gersoglygyndaky ilçisi Sapar Palwanow sişenbe güni Türkmenistanyň Ýewropa Bileleşiginiň (ÝB) ýanyndaky wekili hökmünde ÝB-niň Protokol gullugynyň müdiri Teri Beşe ynanç hatynyň nusgasyny gowşurdy. Bu barada Türkmenistanyň Belgiýadaky ilçihanasy habar berdi.
Duşuşygyň dowamynda diplomatlar ikitaraplaýyn hyzmatdaşlygy güýçlendirmegiň we ony täze derejä çykarmagyň ýollary boýunça pikir alyşdylar.
Sapar Palwanow Türkmenistanyň özara hyzmatdaşlygyň ugurlaryny giňeltmäge we bar bolan ikitaraplaýyn mehanizmleri gowulandyrmaga ygrarlydygyny tassyklady.
Şeýle hem söhbetdeşligiň barşynda ähli ugurlardaky ikitaraplaýyn gatnaşyklara ep-esli itergi berip biljek iň ýokary derejede özara hyzmatdaşlygy gurmaga aýratyn üns berildi. Taraplar daşky gurşawy goramak, energiýa hem-de bilim ýaly pudaklary ileri tutulýan ugurlar hökmünde kesgitlediler.
Duşuşygyň ahyrynda türkmen ilçisi we ÝB-niň Protokol gullugynyň müdiri iki ýurduň hyzmatdaşlyk üçin uly mümkinçilikleriniň bardygyny we taraplaryň özara peýdaly gatnaşyklaryny täze derejä çykarmaga goşant goşjakdyklaryny aýtdylar.