24-nji oktýabrda Kazanda, Türkmenistanyň Ministrler Kabinetiniň Başlygynyň orunbasary B.M.Orazdurdyýewa şäheriň ýokary okuw jaýlarynda bilim alýan türkmen talyplary bilen duşuşyk geçirdi.
Söhbetdeşligiň dowamynda wise-premýer talyplaryň okuwdaky üstünlikleri, ýaşaýyş şertleri we daşary ýurt bilim ulgamyna hem-de medeni gurşawyna uýgunlaşmagy bilen gyzyklandy.
Orazdurdyýewa, türkmen raýatlarynyň nirede bolsalar-da, olaryň aladasyny etmegiň döwlet syýasatynyň ileri tutulýan ugurlarynyň biri bolup durýandygyny nygtady. Duşuşykda ýaşlary milli däp-dessurlaryň we ýokary ahlak gymmatlyklarynyň ruhunda terbiýelemek meselelerine aýratyn üns berildi.
Türkmenistanda we bütin dünýäde giňden bellenilýän beýik türkmen şahyry Magtymguly Pyragynyň doglan gününiň 300 ýyllygy mynasybetli duşuşyga gatnaşyjylara akyldar şahyryň goşgular ýygyndysy we ýadygärlik sowgatlary gowşuryldy.