22-nji fewralda Türkmenistanyň DIM Raşid Meredow we Russiýaly kärdeşi Sergeý Lawrow bilen Moskwada duşuşdylar.
Lawrow özüniň giriş sözünde birnäçe wajyp mowzuklary belledi diýip Russiýanyň DIM-gi habar berýär.
Birinjiden, ol “Türkmenistanda rus diline uly üns berilýändigi üçin minnetdarlyk” bildirdi. “Ýaş adamlar rus ýokary bilimine barha köp üns bermäge başladylar. Biz olaryň gyzyklanmalaryny kanagatlandyrmaga her dürli kömege taýýar” diýip ministr aýtdy.
Ikinjiden, “saglygy saklaýyş boýunça gowy özara gatnaşyklar bar”. “Türkmenistan ilkinjiler hatarynda rus sanjymlaryny resmi hasaba aldy.
Biz şol sanjymlary Türkmenistana ýetirmegi ýola goýdyk.Biz olaryň üstünlikli ulanylýandygyny bilýäris.Çünki,olar koronawirus ýokanjy bilen bagly meseleleri hakykatdanam çözýär” diýip Lawrow nygtady.
Üçünjiden, Lawrowyň bellemegine laýyklykda, Aşgabatdaky VI Hazar sammitine taýaýrlyk jemleýji etabyna ýakynlaşýar.
“Şu ýyl myhmansöýer Türkmenistanda ýygnanjakdygymyza we häzir gepleşikler çygryndaky kararlary kabul etjekdigimize ynanýarys.Biz gepleşikler prosesini birmeňzeş kabul edýäris. Bize jemleýji resminamalarda gowy netijeli pakete ylalaşmagyň başartjakdygyna ynanýaryn” diýip russiýanyň DIM-giniň başlygy aýdýar.
Türkmenistanyň DIM-ligi gepleşikler barada jikme-jikleri bermän, ministrleriň gepleşiklerinde ikitaraplaýyn hyzmatdaşlygyň köp meseleleri barada maslahat edildi diýen habarlar bilen çäklendi.
Bellenmegine görä, “syýasy, söwda-ykdysady,gumanitar-medeni pudaklarda Türkmenistanyň we Russiýanyň jebis hyzmatdaşlygy täze ugurlara ýetýär”.
Şeýlede Meredow Russiýanyň Federal ýygnagynyň Federal Geňeşiniň halkara gatnaşyklar toparynyň başlygy Georgiy Karasin bilenem duşuşyp, 2022-nji ýylyň maýynda MA ýurtlarynyň we Russiýanyň Parlamentara duşuşygyny Aşgabatda geçirmegi gürrüň etdi.
Meredow Russiýa Federasiýasynyň goňşy GDA agza ýurtlary bilen serhetlerini kesgitlemek we bellemek boýunça prezidentiň ýörite wekili, Hazar boýunça köptaraplaýyn gepleşiklerde rus toparynyň başlygy bolan Mihaýil Petrakow bilen Hazarýaka döwletleriniň altynjy sammitini maslahatlaşdy.
Ol GDA-niň ýerine ýetiriji toparynyň başlygynyň orunbasary Ilhom Nematow bilen 12-nji martda Türkmenistanda geçiriljek irki prezidentlik saýlawlaryna GDA-niň synçylar missiýasyny ýollamagy gurnamak meselelerini maslahat etdi.
Türkmenistanyň we Russiýanyň DIM-niň gepleşikleriniň jemleri boýunça iki ýurdyň arasynda diplomatiýa gatnaşyklarynyň ýola goýulmagynyň 30 ýyllygy boýunça Bilelikdäki Beýannama kabul edildi, şeýlede aşakdaky ylalaşyklara gol goýuldy:
-Türkmenistanyň we Russiýanyň sebitara howpsuzlyk boýunça gatnaşyklary barada “ýol kartasy”,
– 2022-2025-nji ýyllarda halkara maglumat howpsuzlygy boýunça türkmen-rus hyzmatdaşlygynyň esasy ugurlaryny durmuşa geçirmek barada meýilnamasy,
-Türkmenistanyň we Russiýanyň arasynda diplomatiýa gatnaşyklarynyň ýola goýulmagynyň 30 ýyllygy boýunça çäreleriň meýilnamasy.
Russiýanyň DIM-niň Twitter hasabynda Lawrowyň we Meredowyň bilelikdäki ylalaşyklara gol goýuşlyk dabarasynyň wideýo ýazgysy goýuldy.
The post Türkmenistanyň we Russiýanyň DIM-ri sebitara we maglumat howpsuzlyklary barada ylalaşyklara Moskwada gol goýdylar first appeared on Türkmenistanyň Hronikasy.