Türkmenistanyň topary Indonedziýada geçirilen Halkara oýlap tapyşlaryň ýarmarkasynda (ISIF) özüniň ylmy oýlap tapyşyny tanyşdyrdy.
Türkmen wekiliýetiniň düzüminde Türkmenistanyň Oguz han adyndaky Inžener-tehnologiýalar uniwersitetiniň wekilleri bu falkara foruma gatnaşdylar. Has takygy, şol ýokary okuw mekdebiniň mugallymy Mekan Alliýew hem-de 4-nji ýyl talyby Gowşut Akmyradow Halkara oýlap tapyşlaryň ýarmarkasyndaTürkmenistana wekilçilik etdiler. Bu barada Türkmenistan: Altyn asyr habar berýär.
Halkara oýlap tapyşlaryň ýarmarkasy bilim, jemgyýetçilik ylymlar, daşky gurşaw, ýaşaýyş-durmuş esaslary, tehnologiýa, matematika, fizika we energetika inženerçiligi ýaly ýedi ugur boýunça geçirildi.
Forum 24 ýurtdan 324 topary bir ýere jemledi.
Çäre Indoneziýanyň Ýaşlar assosiasiýasy tarapyndan guralyp, onuň çäklerinde dürli ulgamlara innowasiýalary ornaşdyrmagyň gelejegi maslahatlaşyldy, ylmyň we tehnologiýanyň gelejegine täsirini ýetirip biljek alymlaryň we inženerleriň ýeten üstünlikleri bilen tanyşdyryldy. Ýarmarka oňa gatnaşyjylar üçin ylmy işleri bilen tanyşdyrmak we bu ugurdaky halkara gatnaşyklaryny ösdürmek, şeýle-de bilim we innowasiýa ulgamynda hyzmatdaşlygy berkitmek üçin amatly meýdança boldy.