Türkmenistanyň Prezidenti Serdar Berdimuhamedow penşenbe güni Kazan şäherinde geçen XVI BRIKS Sammitiniň çäklerinde Birleşen Milletler Guramasynyň Baş sekretary Antoniu Guterriş bilen duşuşyk geçirdi. Bu barada Türkmenistanyň resmi metbugaty habar berýär.
Duşuşygyň barşynda taraplar mähirli salamlaşyp, häzirki döwrüň umumy wezipelerini nazara almak bilen, Türkmenistan bilen BMG-niň arasyndaky netijeli hyzmatdaşlygyň häzirki ýagdaýyny we geljegini maslahatlaşdylar. Türkmenistanyň Prezidenti Serdar Berdimuhamedow Antoniu Guterrişi Birleşen Milletler Guramasynyň güni mynasybetli tüýs ýürekden gutlady we şu duşuşygyň netijeleriniň hyzmatdaşlygy ösdürmäge täze itergi berjekdigine ynam bildirdi.
Türkmenistanyň döwlet Baştutany oňyn Bitaraplyk ýörelgelerine eýermek bilen halkara jmegyýetçiligi bilen gatnaşyklary işjeň ösdürýändigini belledi.
Söhbetdeşler 2025-nji ýyly “Halkara parahatçylyk we ynanyşmak ýyly” diýip yglan etmek barada Türkmenistanyň başlangyjyny maslahatlaşyp, öňde boljak şanly wakalaryň Türkmenistanyň hemişelik Bitaraplygynyň 30 ýyllygynyň hem-de BMG-niň döredilmeginiň 80 ýyllygynyň möhüm ähmiýetini bellediler.
Duşuşygyň dowamynda möhüm ugurlarda hyzmatdaşlygy giňeltmegiň mümkinçiliklerine hem garaldy. A.Guterriş Türkmenistanyň halkara gatnaşyklarda parahatçylygy we ynanyşmagy berkitmäge gönükdirilen başlangyçlaryna ýokary baha berdi hem-de Türkmenistanyň Prezidenti Serdar Berdimuhamedowyň Sammitde beýan eden teklipleriniň möhüm ähmiýetlidigini belledi.
Duşuşygyň ahyrynda taraplar berk jan saglyk, abadançylyk, alyp barýan işlerinde üstünlikleri arzuw edip, Türkmenistan bilen BMG-niň arasyndaky hyzmatdaşlygyň üçünji müňýyllygyň maksatlaryna ýetmekligiň bähbidine yzygiderli ösdüriljekdigine ynam bildirdiler.