1-nji sentýabrda hormatly Prezidentimiz Serdar Berdimuhamedow Rumyniýanyň Türkmenistanda täze bellenen Adatdan daşary we Doly ygtyýarly ilçisi Ion Nawaly kabul etdi.
Diplomat ynanç hatyny gowşurmak bilen, döwlet Baştutanymyza Rumyniýanyň Prezidenti Klaus Werner Ýohannisiň mähirli salamyny hem-de onuň özygtyýarly ösüş ýolundan ynamly öňe barýan Türkmenistan bilen däp bolan dostluk, oňyn hyzmatdaşlyk gatnaşyklarynyň pugtalandyrylmagyna aýratyn ähmiýet berilýändigi baradaky sözlerini ýetirdi.
Hormatly Prezidentimiz Serdar Berdimuhamedow dostlukly ýurduň doly ygtyýarly wekilini ýokary diplomatik wezipä bellenilmegi bilen gutlap, Rumyniýanyň ýolbaşçylaryna iň gowy arzuwlaryny beýan etdi we Türkmenistanda-da ikitaraplaýyn hem-de köptaraplaýyn esasda, şol sanda iri halkara guramalaryň, abraýly sebit düzümleriniň çäklerinde üstünlikli ösdürilýän döwletara gatnaşyklaryň hemmetaraplaýyn pugtalandyrylmagyna uly üns berilýändigini nygtady.
Döwlet Baştutanymyz şu ýyl Türkmenistanyň Ýewropadaky öňden gelýän hem-de möhüm hyzmatdaşlarynyň biri bolan Rumyniýa bilen diplomatik gatnaşyklarynyň ýola goýulmagynyň 30 ýyllygynyň bellenilýändigini aýdyp, şu döwrüň içinde iki ýurduň arasyndaky bilelikdäki işiň oňyn tejribesiniň toplanandygyny, hyzmatdaşlygyň ygtybarly şertnama-hukuk binýadynyň döredilendigini kanagatlanma bilen belledi.
Rumyn diplomaty hoşniýetli sözler hem-de türkmen topragynda görkezilen myhmansöýerlik üçin hoşallyk bildirip, iki döwletiň we halkyň bähbitlerine kybap gelýän hoşniýetli gatnaşyklary pugtalandyrmak üçin ähli tagallalary etjekdigine ynandyrdy.
Söhbetdeşler türkmen-rumyn gatnaşyklarynyň häzirki ýagdaýy, ony ösdürmegiň geljegi baradaky pikir alyşmalaryň dowamynda syýasy-diplomatik, söwda-ykdysady, medeni-ynsanperwer ulgamlarda hyzmatdaşlygy giňeltmek üçin uly mümkinçilikleriň bardygyny bellediler.
Gyzyklanma bildirilýän halkara syýasatyň möhüm ugurlary babatda, parahatçylygyň, howpsuzlygyň we durnukly ösüşiň üpjün edilmegine gönükdirilen möhüm teklipdir başlangyçlaryň özara goldanylmagynyň ähmiýeti nygtaldy. Şunuň bilen baglylykda, iki ýurduň dünýä giňişliginde, şol sanda halkara guramalaryň, ilkinji nobatda, BMG-niň çäklerinde geljekde-de hyzmatdaşlygy pugtalandyrmaga özara gyzyklanmasy beýan edildi.
Döwlet Baştutanymyz we ilçi ikitaraplaýyn hyzmatdaşlyk barada aýtmak bilen, giň ugurlarda, şol sanda energetika, söwda, oba hojalygy, ulag we aragatnaşyk, himiýa hem-de ýeňil senagat ýaly strategik ulgamlarda özara bähbitli söwda-ykdysady hyzmatdaşlygy mundan beýläk-de işjeňleşdirmegiň zerurdygyna ünsi çekdiler. Şunda Ykdysady we ylmy-tehniki hyzmatdaşlyk boýunça hökümetara türkmen-rumyn toparyna möhüm orun degişlidir.
Bu topar söwda gatnaşyklarynyň pugtalandyrylmagyna, hyzmatdaşlygyň täze görnüşleriniň, usullarynyň öwrenilmegine ýardam bermelidir. Şeýle-de ynsanperwer ulgamda, hususan-da, ylym, medeniýet we bilim ugurlary boýunça döwletara gatnaşyklaryň hemmetaraplaýyn giňeldilmegi ileri tutulýan wezipeleriň hatarynda görkezildi.
Duşuşygyň ahyrynda hormatly Prezidentimiz Serdar Berdimuhamedow Rumyniýanyň Adatdan daşary we Doly ygtyýarly ilçisi Ion Nawaly Türkmenistanda diplomatik işine başlamagy bilen ýene bir gezek gutlady we oňa döwletara gatnaşyklary pugtalandyrmak ugrunda jogapkärli wezipesini ýerine ýetirmekde üstünlikleri arzuw etdi.