Türkmenistanyň Prezidenti Serdar Berdimuhamedow şu ýylyň 29-njy sentýabrynda Berlin şäherinde Germaniýanyň Federal Prezidenti bilen Merkezi Aziýa ýurtlarynyň Döwlet Baştutanlarynyň arasynda geçiriljek duşuşyga gatnaşar.
Germaniýanyň Federal Prezidentiniň metbugat gullugynyň habar bermegine görä, ýurduň Prezidenti Frank-Walter Ştaýnmaýeriň Türkmenistanyň Prezidenti Serdar Berdimuhamedow, Gazagystanyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistanyň Prezidenti Emomali Rahmon we Özbegistanyň Prezidenti Şawkat Mirziýoýew bilen duşuşmagyna garaşylýar.
Duşuşyk we bilelikde surata düşmak dabarasy Germaniýanyň Federal Prezidentiniň resmi rezidensiýasy bolan “Belwýu” köşgünde geçiriler.
Ozal Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredow sanly ulgam arkaly geçirilen iş maslahatynyň dowamynda türkmen-german ykdysady forumynyň şu ýylyň oktýabr aýynda Germaniýada geçiriljekdigini habar berdi.