Türkmenistanyň Prezidenti Serdar Berdimuhamedow sişenbe güni Aşgabatda “Kawasaki Heavy Industries Ltd.” ýapon kompaniýasynyň strategik meseleler boýunça uly geňeşçisi Tatsuýa Watanabeni, “Cifal” kompaniýasynyň prezidenti Žil Remini, “CARPI Tech” kompaniýasynyň baş direktory Fransua Troneli we kompaniýanyň prezidenti Alberto Maria Skuerony we “CLAAS” kompaniýasynyň paýdarlar jemgyýetiniň başlygy, German ykdysadyýetiniň Gündogar komitetiniň başlygy Katrina Klaas-Mýulhoýzeri aýratynlykda kabul etdi.
“Kawasaki Heavy Industries Ltd.” Ýapon kompaniýasynyň strategik meseleler boýunça uly geňeşçisi Tatsuýa Watanabe bilen duşuşyk:
Duşuşygyň çäklerinde Türkmenistanda amala aşyrylýan, milli ykdysadyýeti döwrebaplaşdyrmaga we okgunly ösdürmäge gönükdirilen giň gerimli maksatnamalary nazara almak bilen, özara gatnaşyklaryň geljegi barada pikir alşyldy. Türkmenistanyň himiýa we nebitgaz pudagyny ösdürmekde täze taslamalary durmuşa geçirmek, hususan-da, ýurdumyzda fosfor, ammiak, karbamid we tebigy gazdan benzin öndürýän desgalaryň önümçiligini artdyrmak boýunça tekliplere seretmäge taýýardyrys diýip, Türkmenistanyň Döwlet Baştutany nygtady.
Tatsuýa Watanabe öz gezeginde Ýaponiýanyň işewür toparlarynyň geljegi uly türkmen bazaryna aýratyn gyzyklanma bildirýändigini we türkmen hyzmatdaşlaryna öz tejribesini, iň täze tehnologik işläp taýýarlamalaryny hödürlemäge taýýardygyny belledi.
“Cifal” kompaniýasynyň prezidenti Žil Remi bilen duşuşyk:
Duşuşygyň barşynda türkmen tarapynyň fransuz kompaniýalarynyň gazananlaryny mundan beýläk-de ösdürmäge gyzyklanma bildirýändigi bellenildi we fransuz hyzmatdaşlaryň anyk tekliplerine garamaga taýýardygy tassyklanyldy.
Žil Remi “Cifal” kompaniýasynyň bilelikdäki täze taslamalary amala aşyrmaga gyzyklanma bildirýändigini nygtap, ýolbaşçylyk edýän düzüminiň öz üstüne alan hyzmatdaşlyk borçnamalaryny ýerine ýetirmäge berk eýerjekdigine ynandyrdy.
“CARPI Tech” kompaniýasynyň baş direktory Fransua Tronel we kompaniýanyň prezidenti Alberto Maria Skuero bilen duşuşyk:
Duşuşygyň barşynda “CARPI Tech” kompaniýasynyň ýolbaşçylary türkmen bazarynyň Fransiýanyň işewür toparlary üçin örän özüne çekijidigini bellediler.
Türkmenistanyň Prezidenti “CARPI Tech” kompaniýasynyň suw desgalarynda ulanylýan gidroizolýasiýa we suwasty ýörite gatlaklaryň önümçiligi boýunça dünýäde öňdebaryjylaryň biri bolup durýandygyny we toplan oňyn tejribesini nazara alyp, onuň uzak möhletli hyzmatdaşlyk üçin oňat mümkinçilikleriniň bardygyny belledi we türkmen tarapynyň kompaniýanyň anyk tekliplerine garamaga taýýardygyny nygtady.
“CLAAS” kompaniýasynyň paýdarlar jemgyýetiniň başlygy Katrina Klaas-Mýulhoýzer bilen duşuşyk:
Türkmenistanyň Döwlet Baştutany Katrina Klaas-Mýulhoýzeriň şu gezekki saparynyň we meýilleşdirilen gepleşikleriň netijeleriniň “CLAAS” kompaniýasynyň türkmen bazaryndaky işini giňeltmäge, Türkmenistan bilen Germaniýanyň arasyndaky işjeň hyzmatdaşlygy ösdürmäge ýardam etjekdigine ynam bildirdi.
Şeýle hem duşuşykda türkmen tarapynyň germaniýaly hyzmatdaşlarynyň geljekki hyzmatdaşlyk babatda tekliplerine garamaga taýýardygy tassyklanyldy.
Mundan başga-da, Türkmenistanyň Prezidenti Serdar Berdimuhamedow sişenbe güni Aşgabatda Ýewropa Bileleşiginiň Türkmenistanda täze bellenen Adatdan daşary we Doly ygtyýarly ilçisi Beata Peksany kabul etdi.