ok.ru/turkmenworldyň fotosuratlary
Türkmenistanda maý aýynda çilimkeşlige garşy göreşiň biraýlygy yglan edildi. Şu sebäpden döwlet dükanlaryndan ýene bir gezek çilim ýitirim boldy.
Emma hususy dükanlarda satylýan çilimleriň görnüşi görnetin köpeldi we olary indi açyk satýarlar. “Türkmenistanyň Hronikasynyň” çeşmeleriniň maglumatlaryna görä, gaplaryndaky ýazgylaryndan çen tutulsa, satuwda dürli ýurtlaryň has dürli-dürli markaly çilimler peýda boldy. Çilimiň Eýrandan, ABŞ-dan, Russiýadan, Germaniýadan, hatda Ermenistandan (Garni) hem getirilýändigini aýdýarlar.
Belli markaly çilimleriň, mysal üçin LM, Winston, Parlament, Esse, Kent çilimleriniň bir gaby 50-den 60 manat (“Gara bazar” kursunda $7-8e golaý) ýa-da 1 çilim 3-4 manat ($0,4-0,5) aralygynda satylýar.
Halk arasynda gaby 40-dan 50 manada ($5-7) çenli aralykda has arzan çilimler meşhur (Vision, West, GM, Liberty, HD, Garni), olaryň 1 çilimini 2-2,50 manada ($0,3-0,35) satýarlar.
Habar berilmegine görä, temmäki önümleriniň bahalarynyň gymmatdygy sebäpli, çilimkeşleriň köpüsi çilimi pul goşup, bileleşip alýar we soňra ýa onuň gabyny paýlaşýar, ýa-da bir çilimi iki, üç bolup çekýärler. Olaryň hemmesi diýen ýaly çekýän çilimini geçegçilerden ýaşyrmaga çalyşýar, sebäbi çilim çekýäni görseler, derrew sordursana diýip, çilim sorap başlaýarlar.
Ýatladýarys, Türkmenistanda çilim ýetmezçiligi 2016-njy ýylyň martynda, haçanda prezident Gurbanguly Berdimuhamedow öz karary bilen Söwda we daşary ykdysady aragatnaşyklar ministrligini ýurduň territoriýasynda temmäki önümlerini getirmäge we satmaga ýeke-täk ygtyýarly edara edende başlandy. Şondan bäri çilimi diňe döwlet dükanlarynda satmaga rugsat berýärler.
Türkmenistanda indi çilim bir ýyldan gowrak wagt bäri birden ýitirim bolýar, birden bolsa az wagtlyk satuwa çykarylýar.Bu ýagdaý dükanlarda uly nobatlaryň we basalaşygyň döremegine sebäp bolýar.