Şu gün Ankarada Türkiýe Respublikasynyň milli goranmak ministri Ýaşar Güler bilen Türkmenistanyň goranmak ministri Begenç Gündogdyýewyň arasynda gepleşikler geçirildi.
Anadolu türk habarlar gullugynyň habar bermegine görä, duşuşygyň dowamynda iki doganlyk ýurduň arasynda goranmak ulgamynda alnyp barylýan gatnaşyklary mundan beýläk-de ösdürmegiň, hususan-da, sanly tehnologiýalar boýunça hyzmatdaşlygy işjeňleşdirmegiň meseleleri ara alnyp maslahatlaşyldy.
Bellenilişi ýaly, Garaşsyz, hemişelik Bitarap Türkmenistan diňe goranyş häsiýetine eýe bolan Harby doktrinasynyň ýörelgelerine üýtgewsiz eýerýär. Şunuň bilen baglylykda, Türkiýe Respublikasy bilen bu ugurda hyzmatdaşlygy pugtalandyrmagyň Türkmenistanyň parahatçylyk söýüjilikli daşary syýasatynyň ileri tutulýan ugurlarynyň biri bolup durýandygy bellenildi.
Duşuşygyň ahyrynda taraplar ýola goýlan hyzmatdaşlygyň mundan beýläk-de ösdüriljekdigine ynam bildirdiler.
Ozal habar berşimiz ýaly, şu ýylyň 20-nji iýunynda Aşgabatda Türkmenistanyň Döwlet howpsuzlyk geňeşiniň sekretary, goranmak ministri B.Gündogdyýew Türkiýe Respublikasynyň milli goranmak ministri Ýaşar Güler bilen duşuşyk geçiripdi.