Türkmenistanyň “Garagum” hojalyk jemgyýeti bilen Hytaýyň “CNEC” (China Nuclear Industry Fifth Construction Co., Ltd.) kompaniýasy himiýa senagatynda hyzmatdaşlyk etmek hakynda Ähtnama gol çekdiler. Degişli resminama gol çekmek dabarasy 3 5-nji noýabrda Aşgabat şäherinde geçirilen “Türkmenistanyň gurluşyk, senagat, energetika pudaklarynyň ösüşi” atly halkara sergisiniň (CIET 2024) çäklerinde geçirildi.
1992-nji ýylda döredilen, Aşgabat şäheriniň Ruhabat ýaşaýyş toplumynda ýerleşýän “Garagum” hojalyk jemgyýeti ýurtda dokalmadyk önümleri ilkinji bolup ýola goýan öňdebaryjy kärhanalaryň biri hökmünde öz harytlarynyň daşarky bazarlara çykarylyşyny üstünlikli ilerledýär.
“Garagum” hojalyk jemgyýetiniň düzümine girýän “Garagum Nonwoven” kärhanasy spanbond, meltblaun, spanmelt ýaly dokalmadyk önümleri öndürýän Merkezi Aziýada öňdebaryjy kompaniýalaryň biri hökmünde özüni tanatdy. Bu ýerde örtük, öňlük we iş eşikleri ýaly taýýar önümleriň önümçiligi hem ýola goýlandyr.
“China Nuclear Engineering & Construction Corporation Limited” (CNEC) korporasiýasynyň agzasy “CNEC” (China Nuclear Industry Fifth Construction Co., Ltd.) kompaniýasy “China National Nuclear Corporation” (CNNC) kompaniýasynyň möhüm birligidir. Ol milli goranyş, atom energetikasy we senagat gurluşygy ulgamlaryndaky taslamalara ýöriteleşen iri toplumlaýyn gurluşyk kompaniýasy bolup durýar.