Türkmenistanda
1. Türkmenistanyň daşary işler ministri Raşid Meredow Lýuksemburgda geçirilen ministrler derejesindäki 19-njy Merkezi Aziýa — Ýewropa Bileleşigi formatyna gatnaşdy. Türkmenistanyň daşary syýasat edarasynyň ýolbaşçysy iş saparynyň çäklerinde birnäçe ikitaraplaýyn duşuşyklary geçirdi, olarda ikitaraplaýyn we köptaraplaýyn hyzmatdaşlygy işjeňleşdirmegiň hem-de giňeltmegiň meseleleri ara alnyp maslahatlaşyldy.
2. 3-5-nji noýabr aralygynda Aşgabatda Koreýanyň Medeniýet hepdeligi geçiriler, onuň çäklerinde aýdym-saz konserti we kinofestiwal guralar.
3. Türkmenistanda ýyladyşhanalarda ösdürilip ýetişdirilen limonlaryň hasylyny köpçülikleýin ýygnamak möwsümi başlandy. Ahal welaýatynyň limonlaryna türkmen halkynyň arasynda uly isleg bildirilýär. Güýz-gyş döwründäki limonlar saçakdaky goşmaça witaminlerdir.
4. Türkmenistanda 2023-nji ýylyň oktýabr aýynda geçirilen Arkadagyň säheri atly ilkinji halkara film festiwaly barada dokumental filmiň üstünde işlenilmegi tamamlaýjy tapgyrda alnyp barylýar. Filmde dürli ýurtlardan myhmanlary çagyrmakdan başlap, ýapylyş dabarasyna çenli festiwalyň taýýarlanylyşynyň we geçirilişiniň ähli tapgyrlary barada gürrüň berler. Filmde meşhur myhmanlar bilen söhbetdeşlikler, açylyş dabarasynyň wideoýazgylary, şeýle hem Türkmenistanyň Medeniýet institutynda geçirilen ussatlyk sapaklary görkeziler.
5. Astanada Türkmenistanyň Saglygy goraýyş we derman senagaty ministrliginiň we Bütindünýä saglygy goraýyş guramasynyň wekilleriniň duşuşygy geçirildi. Duşuşykda taraplar Türkmenistanda 2023-nji ýylyň ahyryna çenli we 2024-nji ýylyň birinji ýarymynda dürli derejeli bilelikdäki çäreleri geçirmek meselesini ara alyp maslahatlaşdylar.
6. Türkmen suratkeşleri Dilber we Jeýran Umarowlaryň eserleri Türkiýäniň Kütahýa şäherinde geçirilen amaly-haşam sungatynyň sergisinde görkezildi. Sammit medeniýet we döredijilik ulgamlarynda hyzmatdaşlygy pugtalandyrmaga gönükdirildi.
Dünýäde
7.BAE-niň Ma Hawa kompaniýasy howadan alýan suwy üçin dispenserleri çykardy.Täze taslama häzirlikçe diňe korporatiw müşderiler üçin öndüriler, ýöne ýakyn wagtda öýde ulanmak üçin nusgalar hem peýda bolmaly.
Hiçlikden suw almak üçin dispenser howany özüne çekýär, süzgüç ulgamy arkaly ony arassalaýar we sowadýar, şeýlelikde, suw kondensanty emele gelýär.Alnan suw ýene bir gezek arassalanýar we ultramelewşe şöhle bilen gaýtadan işlenýär, şondan soň ol içmek üçin ýaramly bolýar.
8. Pitsburgda adaty bolmadyk sergi geçiriler, onuň eksponatlary Titanik gämisiniň heläkçilige uçran ýerinden seresaplylyk bilen alnan 154 sany hakyky tapyndy bolar. Serginiň eksponatlarynyň arasynda gämiden tapylan atyr çüýşeleri we olaryň etiketkalary, oýun kartlary, ýolagçylaryň şaý-sepleri we gap-gaçlar bar. Sergini gurnaýjylar ony dünýäniň dürli künjeklerinden azyndan 30 million adam görer diýip çaklaýarlar.
Sport habarlary
9. Ahal AFK Çempionlar ligasynyň toparçalaýyn tapgyrynyň üçünji aýlaw oýnunda Pahtakor bilen duşuşar. Oýun şu gün Daşkende geçiriler we Aşgabat wagty sagat 19:00-da başlar. Pahtakor Ahal duşuşygyny Türkmenistanyň çägindäki IPTV ulgamynda bar bolan Futbol we Sport teleýaýlymlarynda göni ýaýlymda tomaşa edip bilersiňiz.
10. Türkmen türgenleri 16 20-nji noýabr aralygynda ABŞ-da geçiriljek uşu boýunça dünýä çempionatyna gatnaşmaga işjeň taýýarlanýarlar. Häzirki wagtda türgenler milli ýygyndynyň baş tälimçisi Şirmyrat Berdiýewiň ýolbaşçylygynda taýýarlygyň ahyrky tapgyrynda barýarlar. Ol 2012-nji ýyldan bäri türkmen uşuçylaryny türgenleşdirýär we olar bilen halkara sahnasynda köp üstünlikleri gazandy.