2024-nji ýylyň oktýabr aýynda Türkmenistanyň Bilim ministrliginiň Kärdeşler Arkalaşygynyň ilkinji guramasynyň wekilleri Hytaý Halk Respublikasynyň Kärdeşler Arkalaşyklarynyň wekilleri bilen iş saparynyň çäginde duşuşdylar. Duşuşyk Hytaý Halk Respublikasynyň Çanşa şäherinde geçirildi. Türkmen wekiliýeti iş saparynyň barşynda Hunan söwda hünär institutynyň ýolbaşçylary bilen resmi duşuşyk geçirip, iki ýurduň arasyndaky bilim ulgamyndaky hyzmatdaşlygy ösdürmegiň mümkinçiliklerini ara alyp maslahatlaşdylar.
Duşuşyga Türkmenistanyň Bilim ministrliginiň Kärdeşler Arkalaşygynyň ilkinji guramasynyň başlygy T.Gulamow hem-de guramanyň işjeň agzasy Ý.Tuwakow gatnaşdylar.
Duşuşykda taraplar hünärmenleriň bilim derejesini ýokarlandyrmak, täze tehnologiýalaryň ornaşdyrylmagy bilen bagly tejribeleri paýlaşmak boýunça pikir alyşdylar. Şeýle hem, Türkmenistanyň wekilleri Hytaý Halk Respublikasynyň Hunan welaýatynyň Szýunsin daşky gurşawy goramak aksioner jemgyýetine baryp, kompaniýanyň iş prosesi bilen ýerinde tanyş boldular.
Bu saparyň dowamynda kompaniýanyň täze tehnologiýalary ornaşdyryş tejribesi we işgärleriniň hünär derejesini ýokarlandyrmak boýunça alyp barýan işleri bilen baglanyşykly anyk maglumatlar alyndy.
Türkmenistanyň Bilim ministrliginiň wekilleri iş saparynyň barşynda gazanylan tejribeleri we hyzmatdaşlyk mümkinçiliklerini ýurdumyzyñ bilim ulgamyna girizmek boýunça anyk meýilnamalary durmuşa geçirmek maksady bilen birnäçe taslamalary hem ara alyp maslahatlaşdylar.
Bu duşuşyk iki ýurduň arasyndaky bilim we tehnologiýa ugurlaryndaky hyzmatdaşlygyň ösmegine uly itergi berer diýip garaşylýar.