Türkiýeli tanymal aktrisa Zuhal Topalyň alyp barýan we TW8 telewideniýe kanalynda her hepdäniň duşenbe güni berilýän “Ýemekteýiz” atly bäsleşigine asly Türkmenistanly Owadan hem gatnaşdy.
Owadan bäsleşige gatnaşan dört sany garşydaşyna türkmen çorbasyny, palawyny, mantysyny, gök çaýyny we beýleki nygmatlary hödürledi.
Owadan naharlaryny bişirýän wagty türkmen tagamlarynyň nähili taýýarlanyşy barada jikme-jik gürrüň berdi.
Ol 10-11 ýaşyndan bäri nahar bişirýändigini, ilkinji tagam hökmünde üç gatly tort bişirendigini we şekeriň ýerine duz atandygy üçin aglandygyny, emma ene-atasynyň özüni gynandyrmazlyk üçin “örän süýji bolupdyr” diýendiklerini ýatlady.
Şeýlede ol Türkiýäniň Siwas welaýatyndan bolan adamsy Erol bilen 18 ýyl mundan owal Türkmenistandaky bir edarada işleýärkä tanyşyp, oňa durmuşa çykandygyny hem aýtdy.
Owadanyň dört sany bäsdeşiniň käbiri türkmen tagamyny ilkinji gezek iýýändigini,türkmen palawyny we mantysyny hasam gowy görendigini aýtdy. Ol bäsleşigiň ahyrynda garşydaşlaryndan jemi 23 bal aldy.
Geçen ýyl bolsa,asly Türkmenistanly Mahymjan Babahanowa TW8 telekanalynda berilýän meşhur “MasterChef Türkiýe” bäsleşigine gatnaşypdy we türkmen mantysyny taýýarlapdy.
Mahymjan Babahanowa türkmen mantysy bilen “MasterChef Türkiýe” bäsleşiginiň ikinji tapgyryna gatnaşmaga hak gazanypdy.
The post Türkmenistanly zenan Türkiýäniň telewideniýe bäsleşigine gatnaşyp, türkmen tagamlaryny taýýarlady first appeared on Türkmenistanyň Hronikasy.