2022-nji ýylyň iýul aýynyň 1 — 7-si aralygynda Täjigistan Respublikasynyň Duşenbe şäherinde Ýetginjekleriň arasynda ISIJ — 2022 V kubogyny almak ugrunda (Ýunior Halkara mekdebi, ISIJ) informatika dersinden halkara bäsleşik geçirildi.
Dört derejede (matematika, informatika, marafon, estafeta) geçirilen bäsleşige 14 döwletden 200 okuwçy, şol sanda türkmenistanly zehinli mekdep okuwçylarynyň 4-si gatnaşdy.Bäsleşikde Türkmenistanyň mekdep okuwçylaryndan saýlanan topara Aşgabat şäheriniň iňlis dili, himiýa we biologiýa derslerini çuňlaşdyryp öwredýän 86-njy ýöriteleşdirilen orta mekdebiniň informatika mugallymy Ýegenmyrat Annageldiýew ýolbaşçylyk etdi.
Bäsleşigiň şertine görä, birinji derejede 12, ikinji derejede 2, üçünji derejede 4, dördünji derejede 6 sany çylşyrymly meseleler berildi. 6-njy iýulda bäsleşigiň şertini üstünlikli çözmegi başaran ýaş informatikler ýeňiji diýlip yglan edildi.
Halkara bäsleşigiň üçünji derejesinde Aşgabat şäheriniň iňlis dili, himiýa we biologiýa derslerini çuňlaşdyryp öwredýän 86-njy ýöriteleşdirilen orta mekdebiniň 9-njy synp okuwçysy Ylýas Yklymow, 10-njy synp okuwçylary Halymmuhammet Annageldiýew, Orazmuhammet Begenjow, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 10-njy synp okuwçysy Aly Didarow bürünç medallara mynasyp boldular.
Bäsleşigiň dördünji derejesinde hem türkmenistanly mekdep okuwçylary toparlaýyn bürünç medala mynasyp boldular. Netijede, olar bu halkara bäsleşikde şahsy görnüşde 4, toparlaýyn 1, jemi 5 sany bürünç medaly gazandylar.