Türkmenistanly kikboksçylar Wengriýada geçirilen Dünýä kubogynda 10 medala mynasyp boldular. Olaryň üçüsi altyn, biri kümüş, altysy bolsa bürünç medallardyr.
Dünýä kubogynyň resmi saýty ýaryşa 41 döwletden 2 müňden gowrak türgeniň gatnaşandygyny habar berdi.
Eýýäm onlarça ýyldan bäri halkara ýaryşlarda üstünlikli çykyş edip gelýän türkmen türgenleri nobatdaky üstünliklerini Türkmenistanyň at gazanan tälimçisi Aleksandr Snagowskiniň ýolbaşçylygynda gazandylar.
Dünýä kubogynda hormat münberiniň iň ýokarky basgançagyna 54 kilograma çenli agram derejesinde çykyş eden Atajan Atamyradow, 86 kilograma çenli agramda ýaryşan Hajymyrat Geldimämmedow we 91 kilograma çenli agram derejäniň wekili Said Fakirow dagylar çykdy.
60 kilograma çenli agram derejesinde ýaryşan Muhammetnazar Gurbannazarow kümüş medalyň eýesi boldy. Eziz Meredow (51 kilograma çenli agram derejesinde), Pygy Sylabow (60 kilograma çenli), Mekan Begmämmedow (67 kilograma çenli), Goçmyrat Jumanyýazow (75 kiloograma çenli), Serdar Mämmedow (86 kilograma çenli) we Gülzada Jorakulyýewa (65 kilograma çenli) dagylar ýaryşy bürünç medal bilen tamamladylar.
Geçen aýda türkmenistanly kikboksçylaryň Türkiýede geçirilen Dünýä kubogynda hem üstünlikli çykyş edendiklerini ýatladýarys. Olar Stambul şäherinde geçirilen şol ýaryşda hem medallaryň 10-a golaýyny gazanypdylar.