Türkmenistanyň Senagatçylar we telekeçiler birleşmesiniň agzalary sanly ykdysadyýete geçilýän şertlerde döredijilikli işläp, sanly hyzmatlaryň döwrebap görnüşlerini ildeşlerimize elýeterli edýärler. Ýaşyl ada hojalyk jemgyýetiniň Ýoda ykjam goşundysy hem hödürleýän giň mümkinçilikleri bilen ildeşlerimiziň söýgüsini gazanýar. Şular bilen baglanyşykly Ýaşyl ada hojalyk jemgyýetiniň iş dolandyryjysy Silap ABILOW bilen söhbetdeşligi okyjylara ýetirýäris.
— Sanly ulgamyň täze önüminiň — döreden ykjam goşundyňyzyň mümkinçiligi dogrusynda söhbede başlasak!
— Ýoda ykjam goşundysy ýurdumyzdaky söwda we dynç alyş merkezleri, restorandyr kafeler, marketler, sport, gözellik merkezleri, medeni ojaklar, hojalyk hyzmatlary hakyndaky maglumatlary özünde jemleýär.Onuň kömegi bilen gündelik durmuşda gerek bolan zatlaryň ählisini, eliň aýasynda ýaly, gözläp tapmak mümkin.
Häzirki wagtda Ýodada müňden gowrak edara-kärhana hakynda maglumat ýerleşdirildi, has takygy, olaryň salgylary, habarlaşmak üçin telefon belgileri, hödürleýän hyzmatlarydyr harytlary hakynda we başga-da birnäçe maglumatlar elýeterli edildi.
— Ýoda diňe paýtagtymyzyň ýaşaýjylary üçin niýetlenenmi?
— Ýok, bu ykjam goşundyny ýurdumyzyň ähli sebitlerinde-de ulanmak mümkin. Sebäbi ondan welaýatlardaky edara-kärhanalar, harytlardyr hyzmatlar hakynda-da maglumat almak mümkin. Mundan başga-da, ol Aşgabadyň, 5 welaýatyň takyk howa ýagdaýyny habar berýär.
— Ony görkezilen ýerlere barmak üçin peýdalanyp bolarmy?
— Elbetde, ykjam goşundymyzyň kartasyna girizilen binalaryň, desgalaryň, taryhy ýerleriň her biriniň ýerleşýän ýeri anyk görkezilen.Olara gps ulgamy arkaly iň ýakyn ýol bilen barmak mümkin. Ýodada siziň ýerleşýän ýeriňizden bellenen nokada çenli aralyk, ýoluň ugry çalt kesgitlenýär.
— Bu ykjam goşundydan täzeliklerdir habarlar bilen hem tanşyp bolýarmy?
— Munuň üçin ýörite Bildirişler bölümi bar. Oňa girseňiz, ýurdumyzda bolup geçýän çärelerden, arzanladyşlardan habarly bolarsyňyz. Bu bölüm hyzmatlaryny, önümlerini hödürleýän işewürler üçin has-da amatlydyr.
— Türkmenistanda öndürilen bölümi hakynda-da aýdaýsaňyz!
— Bu bölümden ýurdumyzyň önümçilik kärhanalarynyň önümleri, olaryň görnüşleri bilen tanşyp bolýar. Şeýle-de olar bilen habarlaşmak üçin telefon belgilerini, kartada ýerleşýän ýerini görüp bilersiňiz.
Çeşme: "Rysgal" gazeti.