Turkmenportal web saýtymyzda habar berşimiz ýaly, Türkmenistanyň Daşary işler ministrliginiň Halkara gatnaşyklary instituty tarapyndan Halkara Bitaraplyk güni, şeýle-de Türkmenistanyň hemişelik Bitaraplygynyň 26 ýyllygy mynasybetli ýurduň ýokary okuw mekdepleriniň žurnalistika we beýleki hünärlerde okaýan talyp ýaşlarynyň arasynda Türkmenistan — Bitaraplygyň mekany atly fotosurat bäsleşigini yglan edilipdi.
Bäsleşige gatnaşyjylar şu ýylyň 10-njy noýabryndan 3-nji dekabry aralygynda öz düşüren suratlaryny institutyň hgi.hzdek@gmail.com elektron poçtasyna iberdiler. Bäsleşik iki derejede geçirildi. Onuň birinji derejesine ýokary okuw mekdeplerinde žurnalistika ugrundan bilim alýan talyplar, ikinji derejesine bolsa žurnalistikadan beýleki hünärlerde bilim alýan talyp ýaşlar gatnaşdylar.
Bäsleşige gatnaşyjylar suratlaryny şu aşakdaky tema laýyklykda iberdiler:
Türkmenistan — Bitaraplygyň mekany
a) Kuwwatly döwletiň bagtyýar ýaşaýjylary; b) Ösüşler ýurdunyň kämil ýaşlary; ç) Aşgabat — dünýä parahatlyk paýlaýan şäher; d) Arkadagyň binagärlik sungaty; e) Millilik we taryh
Bäsleşige hödürlenen suratlara ýokary okuw mekdebiň mugallymlaryndan hem-de köpçülikleýin habar beriş serişdeleriniň wekillerinden düzülen eminler mynasyp baha berdiler. Eminleriň gutarnykly gelen netijesine laýyklykda şu aşakdaky talyplar ýeňijiler diýlip yglan edildi.
Bäsleşigiň birinji derejesi boýunça baş baýraga TDIM-niň Halkara gatnaşyklary institutynyň talyby Gytja Atdaýewa mynasyp boldy.Baýrakly birinji orna Magtymguly adyndaky TDU-nyň talyby Rejepgeldi Allamyradow, ikinji orna TDIM-niň HGI-niň tayby Gurbanjemal Ödegurbanowa bilen Halkara ynsanperwer ylymlary we ösüş uniwersitetiniň talyby Merjen Alimowa, üçünji orna bolsa Halkara ynsanperwer ylymlary we ösüş uniwersitetiniň talyby Näzli Ýagşymyradowa, şeýle-de şol ýokary okuw mekdebiň talyby Ogulmaýsa Baýramowa bilen TDIM-niň HGI-niň talyby Hatyja Gylyjowa mynasyp boldy.
Fotosurat bäsleşigiň ikinji derejesi boýunça Hytaý Halk Respublikasynyň daşary işler uniwersitetiniň talyby Maksat Nurnazarow birinji, Türkmenistanyň Telekommunikasiýalar we informatika institutynyň talyplary Hurma Çaryýewa hem-de Çaryýarmuhammet Kerimow ikinji, TDIM-niň HGI-niň talyby Arslankerim Kerimow, Türkmenistanyň Içeri işler ministrliginiň institutynyň talyby Kerwenmyrat Halmyradow, şeýle-de S.A.Nyýazow adyndaky TOHU-nyň talyby Aýşa Baýramowa dagy üçünji orunlara mynasyp bolmagy başardylar.
Bäsleşikde iki ugur boýunça ýeňiji bolan talyplara, şeýle-de bäsleşige işjeň gatnaşan talyplaryň birnäçesine Hormat hatlarydyr gymmat bahaly sowgatlar, Höweslendiriji baýraklar gowşuryldy.