Geçen şenbe güni Aşgabat atçylyk sport toplumynda at çapyşygynyň güýzki möwsüminiň açylmagy mynasybetli ýetginjek çapyksuwarlaryň gatnaşmagynda at çapyşygy geçirildi. Bu barada Türkmenistan gazeti habar berdi.
Oňa tomaşa etmäge ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň wekilleri, hormatly ýaşulular, pudagyň işgärleri hem-de at çapyşyklarynyň muşdaklary ýygnandylar.
Güýzki at çapyşyk möwsüminiň ilkinji çapyşygynyň ýedisinde ýurdumyzyň ýaş çapyksuwarlary özleriniň çalasynlygyny hem-de ezberligini görkezdiler. 1000 metr aralyga geçirilen çapyşyklar örän çekeleşikli boldy. Olarda Tamaly, Keýmirçi, Meledag, Mamajan, Gaýratgetir hem-de Nowruzgül-2 ýaly bedewler pellehana ilkinji bolup gelmegi başardylar. Ýeňiş gazanan bedewlere Ý.Kerimberdiýew, E.Hydyrow, Ý.Jummadow, N.Ilewow, Y.Allanazarow ýaly çapyksuwarlar erk etdi.
Jemleýji 7-nji çapyşyk hem janköýerlerde ýatdan çykmajak duýgulary döretdi. Çekeleşikli geçen bu bäsleşikde Türkmenistanyň Prezidentiniň ahalteke atçylyk toplumyna degişli Ýadygär atly dor at pellehana ilkinji bolup gelmegi başardy. Çapyksuwar N.Nunnaýewiň erk eden Ýadygäri 1000 metr aralygy geçmek üçin 1 minut 11.1 sekunt wagt sarp etdi.
Şeýlelikde, ýetginjek çapyksuwarlaryň arasynda geçirilen at çapyşygy ýatdan çykmajak pursatlara baý boldy.Olarda ýeňiş gazanan bedewleriň şanyna dabaraly ýagdaýda baýraklar gowşuryldy.Munuň özi Halkyň Arkadagly zamanasy ýylynda Arkadagly Serdarymyzyň baştutanlygynda Gahryman Arkadagymyzyň başlangyjy bilen hem-de taýsyz tagallalary netijesinde ýurdumyzda ahalteke bedewlerini ösdürip ýetişdirmek, olaryň şan-şöhratyny has-da belende götermek boýunça amala aşyrylýan işleriň barha dabaralanýandygyny, bu asylly işleriň türkmen ýaşlarynyň, şol sanda ýetginjek çapyksuwarlaryň işjeň gatnaşmagynda mynasyp dowam etdirilýändigini görkezýär.
Ýekşenbe güni bolsa Aşgabat atçylyk sport toplumynda at çapyşyklary ussat çapyksuwarlaryň gatnaşmagynda geçirildi. Ýedi aýlawdan ybarat bolan çapyşyklarda iň ýyndam bedewler öňe saýlanmagy başardylar.