1.Türkmenistanda dolandyryş-çäk gurluşyna üýtgeşmeler giriziler.Bu barada Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň başlyklygynda şenbe güni geçirilen parlament mejlisinde bellenildi. Öňe sürlen teklipleriň esasynda Milli Geňeşiň Halk Maslahatynyň Başlygy Gurbanguly Berdimuhamedow umumylykda: 6 etraby (Gubadag etrabyny, Gurbansoltan eje adyndaky etraby, Farap etrabyny, Döwletli etrabyny, Serhetabat etrabyny we Oguzhan etrabyny); 5 sany etrap hukukly şäheri (Tejen şäherini, Gumdag şäherini, Hazar şäherini, Serdar şäherini, Köneürgenç şäherini); 1 sany şäherdäki etraby (türkmenbaşy şäherindäki Kenar etrabyny); 2 obany (Ak bugdaý etrabyndaky Bagabat obasyny, Hazar şäherindäki Garagöl obasyny); 36 sany geňeşligi ýatyrmagyň göz öňünde tutulýandygyny habar berdi.
2.Türkmenistanda dolandyryş üýtgeşmeleriniň geçirilmegi býujetiň tygşytlanmagyna getirer.Welaýatlaryň dolandyryş-çäk gurluşyna üýtgeşmeler girizilmegi netijesinde, takmynan, 28 mln manat möçberinde býujet serişdeleri tygşytlanar.Bu barada şenbe güni geçirilen parlament mejlisinde Türkmenistanyň maliýe we ykdysadyýet ministri Muhammetgeldi Serdarow habar berdi.
Ministriň bellemegine görä, şeýle-de dolandyryş-çäk birlikleriniň kämilleşdirilmegi bilen baglylykda, ulanyşdan boşadylýan bilim, medeniýet we maliýe-ykdysady edaralarynyň edara binalaryny, desgalaryny netijeli peýdalanmak Döwlet býujetiniň girdejilerini artdyrmaga oňyn täsirini ýetirer.
3.Türkmenistanda şäherleriň, etraplaryň, oba ýerleriniň taryhy atlary dikeldiler.Bu barada şenbe güni geçirilen parlament mejlisinde Milli Geňeşiniň Mejlisiniň Başlygy Gülşat Mämmedowa belläp geçdi.Mejlisde Balkan welaýaty boýunça ýerlerden gelip gowşan tekliplere laýyklykda, Serdar etrabynyň we Serdar şäheriniň adyny üýtgedip, olara taryhy adyny, ýagny Gyzylarbat adyny dakmak teklip edilýär. 2 etrabyň, 3 şäheriň, 4 şäherçäniň, 3 geňeşligiň, şeýle-de 21 obanyň adyny üýtgetmek boýunça teklipler taýýarlanyldy.
4. Gülgüne flamingolar gyşlamak üçin Türkmenistana uçup geldiler. Gyzyl kitaba girizilen guşlar Hazar deňziniň günorta-gündogarynda ýerleşýän Hazar döwlet tebigy goraghanasynda hasaba alyndylar. Guşlar yzlaryna indiki ýylyň mart-aprel aýlarynda dolanarlar.
5. Türkmenistanyň iň beýik dagynyň Köýtendagyň depesine ilkinji gar ýagdy. Gar örtügi 2400-2500 metr we ondan ýokary beýiklikde emele geldi. Şonuň bilen birlikde, Köýtendagyň dag eteklerindäki etraplarda ygalyň mukdary örän ujypsyz boldy. Köýtendagyň iň beýik nokady beýikligi 3139 metr bolan Aýrybaba dagydyr, ol Türkmenistanyň iň beýik nokady hasaplanýar.
6. 26-28-nji noýabrda Aşgabatda Türkmenistanyň nebiti we gazy-2022 forumy geçiriler. Bu gözden geçiriliş her ýylda öňdebaryjy nebitgaz kompaniýalarynyň we guramalarynyň, şeýle hem bütin dünýäniň uglewodorod serişdelerini sarp edijileriň ünsüni çekýär. Türkmenistan ägirt uly gaz ýataklaryna eýelik edýär, hususan-da, ýurduň çäginde planetamyzdaky iň iri gaz ýataklarynyň biri bolan Galkynyş gaz käni ýerleşýär.
7. Türkmenistanyň Russiýadaky baş konsuly Güýç Garaýew Kazan federal uniwersitetine bardy. KFU-da 3727 sany türkmenistanly talyp bilim alýar bu görkeziji uniwersitetdäki daşary ýurtly talyplaryň iň köpüsidir. Türkmenistanyň baş konsuly bilim edarasynyň rektory Lenar Safin bilen duşuşyk geçirdi. Gepleşikleriň dowamynda taraplar ýokary taýýarlykly hünärmenleri taýýarlamak meseleleri boýunça Kazan federal uniwersiteti bilen hyzmatdaşlygyň barşy we mümkinçilikleri barada pikir alyşdylar.
8.Si Szinpin Hytaýyň partiýasynyň Baş sekretary wezipesine gaýtadan saýlandy.Hytaýyň Kommunistik partiýasynyň Merkezi komiteti (HKP-niň MK) ýekşenbe güni, 23-nji oktýabrda Si Szinpini Baş sekretar wezipesine 3-nji gezek saýlady. Şeýle hem Si Szinpin Hytaýyň ýokary döwlet harby edarasy HHR-iň merkezi harby geňeşiniň başlygy hökmünde bellenildi.
Forumyň deputatlary onuň dalaşgärligine biragyzdan ses berdiler. 69 ýaşly Si Szinpin Hytaý döwletiniň we MHG-niň baştutany wezipesini 2013-nji ýyldan bäri ýerine ýetirip gelýär.
9. Beýik Britaniýanyň premýer-ministri işden çykýandygyny yglan etdi. Beýik Britaniýanyň Premýer-ministri Liz Trass işden çykýandygyny habar berdi, ol Beýik Britaniýanyň Ministrler Kabinetiniň başlyklygyna 6-njy sentýabrda bellenipdi. Trass bu wezipä başga biri saýlanýança Hökümetiň başlygy hökmünde galjakdygyny aýtdy. Trassyň premýer-ministr wezipesinde işlän döwri Beýik Britaniýa üçin rekord derejede gysga boldy.
10. Altyn asyr we Ahal Türkmenistanyň derbisinde deňme-deň oýnadylar. Duşuşyk türkmen paýtagtynyň Büzmeýin etrabyndaky Sport toplumy stadionynda geçirildi we deňme-deň tamamlandy hasap 0:0. Türkmenistanyň çempionatynda öňküsi ýaly Ahal öňdäki orunda barýar (42 utuk), ol Altyn asyrdan 7 utuk öňdedir. Öňdäki üçlügi Köpetdag tamamlaýar (25).
11.Islam Mahaçew ýeňil agram derejede UFC-niň täze çempiony boldy.Russiýaly MMA urşujysy Islam Mahaçew UFC 280 bäsleşiginde braziliýaly Çarlz Oliweýrany ýeňdi we ýeňil agram derejede çempion boldy.
Agşamyň esasy göreşi şenbe güni Abu-Dabide (BAE) geçirildi.Mahaçew ikinji döwde (raundda) bogmak usulyny ulanyp, Oliweýradan ynamly üstün çykdy. 31 ýaşly dagystanly türgen göreşiň tutuş dowamynda üstünligini saklady we yzly-yzyna 11-nji ýeňşini gazandy.
12.Omanyň Al-sib topary AFK-2022 Kubogynyň ýeňijisi boldy.Kuala-Lumpurda geçirilen final duşuşygynda Al-Sib Malaýziýanyň Kuala-Lumpur Siti toparyndan 3:0 hasabynda ýeňillik bilen üstün çykdy.
AFK Kubogy Aziýanyň futbol konfederasiýasy tarapyndan çempionatlaryň ýeňijileriniň hem-de ýurtlaryň Kuboklarynyň eýeleriniň arasynda geçirilýän ähmiýeti boýunça ikinji toparlaýyn bäsleşikdir.Bäsleşigiň ýeňijisi gönüden-göni AFK-nyň Çempionlar ligasy 2023/2024-e gatnaşmaga hukuk gazanýar.
13. Gazagystanyň, Gyrgyzystanyň, Täjigistanyň we Özbegistanyň Olimpiýa komitetleriniň baş sekretarlary Merkezi Aziýa oýunlaryny diketlmek meselesini ara alyp maslahatlaşdylar. Taraplar bilelikde sport maksatnamasyny işläp düzmegi, şeýle hem Oýunlary geljek iki ýylyň içinde dikeltmegi ylalaşdylar. Onuň geçiriljek ýurdy we senesi soň saýlanar. Merkezi Aziýa oýunlary Halkara olmpiýa komitetiniň howandarlygynda geçirilýär.