Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş direktory Mämmethan Çakyýew we Gyrgyzystanyň wise-premýeri Bakyt Torobaýew Hazar deňzindäki türkmen portlarynyň üsti bilen gyrgyz önümleriniň eksporty baradaky mümkinçilikleri ara alyp maslahatlaşdylar — diýip, Gyrgyz Respublikasynyň hökümetiniň metbugat gullugy habar berýär.
Metbugat gullugynyň maglumatyna görä, çarşenbe güni iki ýurduň resmi wekilleri wideoaragatnaşyk arkaly gepleşikleri geçirip, Gyrgyzystan bilen Türkmenistanyň arasynda energetika, ulag, infrastruktura, oba hojalygy we söwda pudaklaryndaky hyzmatdaşlyk etmegiň meselelerini ara alyp maslahatlaşdylar.
Taraplar söwda gatnaşyklaryny mundan beýläk-de ösdürmegiň zerurdygyny bellemek bilen, sebit we halkara derejesinde netijeli logistika ulgamyny döretmek üçin uly mümkinçilikleri bolan Hazar deňzi arkaly ýük daşamalary artdyrmagyň ähmiýetini nygtadylar — diýip, habar berilýär.
Şunuň bilen baglylykda Gyrgyzystan Özbegistan Türkmenistan Russiýa ugry ýa-da Azerbaýjanyň Alýat deňiz portunyň üsti bilen Ýewropa ýurtlaryna multimodal ýük daşamalaryny guramak meselesine garalýar. Ýolbaşçylaryň belleýşi ýaly, bu ugruň durmuşa geçirilmegi iki ýurduň ykdysady hyzmatdaşlygyny pugtalandyrmaga ýardam eder hem-de harytlary sebitiň içinde daşamak we olary Ýewropa eksport etmek mümkinçiliklerini giňelder.
Şeýle hem Gyrgyzystanyň ýük daşaýjylarynyň Hazar deňzi arkaly gatnawlarynda Türkmenbaşy halkara deňiz portunyň mümkinçiliklerinden has işjeň peýdalanmak maksady bilen ähli görnüşli ulaglar we port hyzmatlary üçin ýeňillikli nyrh görnüşlerine garaldy — diýip, Ministrler Kabinetinde nygtadylar.