Astanada Türkmenistan Ministrler Kabinetiniň Başlygynyň orunbasarlary Batyr Atdaýew we Baýmyrat Annamämmedow bilen Gazagystan Respublikasynyň Premýer-ministriniň birinji orunbasary Roman Sklýaryň arasynda duşuşyk geçirildi. Bu barada Gazagystan Respublikasynyň Premýer-ministriniň resmi web sahypasynda habar berildi.
9-njy awgustda bolan duşuşykda Türkmenistanyň we Gazagystanyň arasyndaky söwda-ykdysady hyzmatdaşlygyň häzirki ýagdaýy we geljegi, şeýle hem energetika pudagyndaky özara gatnaşyklar barada pikir alşyldy.Iki ýurt hem özara gatnaşyklaryň ähli ugurlary boýunça söwda we ykdysady hyzmatdaşlygy kem-kemden giňeldýär. Şeýlelik bilen, 5 ýylyň dowamynda ýurtlaryň arasyndaky özara söwdanyň mukdary 4 esse, diňe geçen ýylda 28 göterim ösdi. Şu ýylyň 6 aýyndaky söwda dolanyşygy 237,2 million dollara deň boldy.
Roman Sklýar Gazagystan bilen Türkmenistanyň arasyndaky hyzmatdaşlygyň hoşniýetli goňşuçylyk ýörelgeleri esasynda ösýändigini, ikitaraplaýyn ykdysady hyzmatdaşlygyň artdyrylmagy üçin uly mümkinçilikleriň bardygyny belledi.Taraplar kabul edilen ylalaşyklaryň türkmen-gazak hyzmatdaşlygynyň ähli ugurlarynyň ösmegine goşmaça itergi berjekdigine ynam bildirdiler.