Türkmenistan bilen Eýran Ykdysady hyzmatdaşlyk boýunça türkmen-eýran hökümetara toparynyň 18-nji mejlisini şu ýylyň ahyryna çenli geçirerler.
Türkmenistanyň DIM-niň habar bermegine görä, bu mesele Türkmenistanyň daşary işler ministri Raşid Meredowyň eýranly kärdeşi Seýed Abbas Aragçi bilen 2024-nji ýylyň 6-njy noýabrynda bolan telefon gepleşiginiň dowamynda maslahatlaşyldy.
Söhbetdeşligiň barşynda ministrler syýasy-diplomatik, söwda-ykdysady we medeni-ynsanperwer ulgamlarda ikitaraplaýyn hyzmatdaşlyga degişli meseleleriň giň toplumyny ara alyp maslahatlaşdylar. Taraplar ýokary derejedäki gatnaşyklaryň oňyn ösüşini nygtap, Türkmenistanyň we Eýranyň prezidentleriniň şu ýylda bolan duşuşyklarynyň dowamynda gazanylan ylalaşyklaryň durmuşa geçirilişine garadylar.
Ministrler daşary işler ministrlikleriniň arasynda hyzmatdaşlygy işjeňleşdirmegiň, şunuň bilen bir hatarda ýakyn wagtda ikitaraplaýyn we köptaraplaýyn görnüşde duşuşyklary geçirmegiň möhümdigini nygtadylar. Söwda-ykdysady gatnaşyklary ösdürmek meselelerine aýratyn üns berildi. Ykdysady hyzmatdaşlyk boýunça türkmen-eýran hökümetara toparynyň geljekki işlerine garaldy.
Mundan başga-da, taraplar medeni-ynsanperwer hyzmatdaşlygy ösdürmegiň meselelerini maslahat etdiler. Noýabr-dekabr aýlarynda birnäçe bilelikdäki çäreleri, şol sanda “Iran Agro Food” sergisini, Çagalaryň dostlugy hepdeligini, zergärçilik boýunça ussatlyk sapaklaryny geçirmek ylalaşyldy.
2023-nji ýylyň 23-nji noýabrynda Aşgabatda iki ýurduň arasynda netijeli hyzmatdaşlygy mundan beýläk-de çuňlaşdyrmaga we giňeltmäge bagyşlanan türkmen-eýran işewürlik maslahaty geçirilipdi.