Söwda-senagat edarasynyň başlygy Birleşen Arap Emirlikleriniň Türkmenistandaky Adatdan daşary we Doly ygtyýarly ilçisi Ahmed Al Hameli bilen duşuşdy. Ol şu ýylyň 25-nji iýunynda Aşgabat şäherinde geçirilen Türkmenistan — Birleşen Arap Emirlikleri işewürlik maslahatynyň jemlerine bagyşlandy. Bu barada Türkmenistanyň Söwda-senagat edarasynyň Metbugat gullugy habar berdi.
Habarda bellenilişi ýaly, duşuşykda iki dostlukly ýurduň döwlet we işewür düzümleriniň ýolbaşçylarynyň hem-de öňdebaryjy kompaniýalarynyň hünärmenleriniň gatnaşan işewürlik maslahatynyň ýokary guramaçylyk, netijeli häsiýete eýe bolandygy bellenildi. Bu forumda emirlikleriň energetika, sanly tehnologiýalar, söwda, oba hojalygy, azyk senagaty, gurluşyk we syýahatçylyk ugurlaryna ýöriteleşen öňdebaryjy kompaniýalarynyň geljegi uly türkmen bazaryndaky ornuny pugtalandyrmagy hem-de giňeltmegi maksat edinýändikleri tassyklanyldy.
Işewürlik maslahatynda ykdysadyýetiň, maýa goýumlaryň dürli ugurlaryndaky, ösen tehnologiýalar pudagyndaky gatnaşyklary täze derejä çykarmagyň ýollary, söwda dolanyşygyny giňeltmegiň mümkinçilikleri seljerildi hem-de bilelikdäki işiň anyk meýilnamalary kesgitlenildi.Forumyň çäklerinde iki ýurduň telekeçileriniň arasynda tejribe alyşmak hem-de ýakyn gatnaşyklary mundan beýläk-de işjeňleşdirmek maksady bilen duşuşyklar guraldy.
Oňa gatnaşyjylar iki ýurduň arasynda işewürlik hyzmatdaşlygyny giňeltmäge täze itergi berýän şunuň ýaly çäreleri geljekde hem guramak üçin Türkmenistanyň Söwda-senagat edarasy bilen BAE-niň Söwda-senagat edaralarynyň federasiýasynyň arasynda özara gepleşikleri dowam etmegiň möhümdigini bellediler.