15-nji sentýabrda Türkmenistanyň hökümetiniň ýangyç-energiýa toplumyna gözegçilik edýän wise-premýer Maksat Babaýew prezident Gurbanguly Berdimuhamedowyň öňünde Türkmenistan-Owganystan-Pakistan-Hindistan (TOPH) gaz geçirijisiniň gurluşygynyň taslamasynyň ýerine ýetirilişi barada hasabat berdi.
Häzirki döwürde gaz geçirijiniň türkmen böleginde işler alnyp barylýar diýip, ТДХ döwlet habar agentligi habar berýär.
Hususan-da Babaýew gaz geçirijiniň degişli böleginiň gurluşygyna 2018-nji ýylyň başynda girişmek hem-de 2019-njy ýylda tebigy gazy akdyryp başlamak maksady bilen, dürli göwrümli enjamlary we turbalary satyn almak üçin halkara bäsleşigini sentýabr aýynyň aýagyna çenli geçirmekçi bolýandyklaryny aýtdy.
Häzirki wagtda gaz geçirijiniň türkmen böleginiň Owganystanyň serhedine golaý ýerleriniň gurluşgyna taýýarlyk görülýär. Şeýle hem gaz geçirijiniň ugrunda guruljak gaz gysyjy beketleriň we beýleki ugurdaş desgalaryň taslamalaryny taýýarlamak işleri alnyp barylýar.
Gaz geçirijiniň Owganystanyň we Pakistanyň çäginden geçjek böleginiň gurluşygyna başlanmaly döwre çenli durmuşa geçirilmeli çäreleriň deslapky tapgyrlary kesgitlenildi.
Bu işler “TAPI Pipeline Сompany Limited” paýdarlar kompaniýasy (TOPH-yň tehniki maslahatçy), Germaniýanyň “ILF Beratende Ingeniure GmbH” we Beýik Britaniýanyň “Allen and Overy LLP” kompaniýalary (hukuk maslahatçy) bilen bilelikde alnyp barylýar.
Ýatladýarys, 2017-nji ýylyň 17-nji ýanwarynda hindi metbugaty ýurduň Gaz we tebigy serişdeler ministrligine salgylanyp, TOPH-yň ulanmaga berilmeginiň 2019-njy ýyldan 2020-nji ýyla süýşürilýändigini, sebäbi türkmen tarapynyň öz üstüne alan maliýe meselelerini çözüp bilmändigini habar berdi.
Bu maglumaty Pakistanyň “Inter-State Gas System” kompaniýasy hem tassyklady.
2017-nji ýylyň maýynda, “Awazada” geçen gaz kongresinde Türkmenistan hem Türkmenistan-Owganystan-Pakistan-Hindistan (TOPH) gaz geçirijisiniň 2020-nji ýylda işe giriziljekdigini aýtdy.