1.Türkmenistan we Özbegistan türkmen tebigy gazyny Özbegistana ibermek barada täze şertnama baglaşmak barada ylalaşdylar.Türkmenistanyň wise-premýeri Batyr Amanow bilen Özbegistanyň energetika ministri Žurabek Mirzamahmudowyň arasynda geçirilen duşuşykda degişli ylalaşyk gazanyldy.
Gepleşiklerde taraplar dürli ugurlar boýunça, şol sanda energetika pudagynda özara hyzmatdaşlygy ösdürmegiň meselelerine garadylar. Şeýle hem energetika ulgamynda ozal gazanylan ylalaşyklary ýerine ýetirmek boýunça görülýän çäreler barada pikir alşyldy.
2.Golaýda Belawiýa täze ulgama geçýändigi sebäpli 1-nji sentýabrdan käbir goşmaça hyzmatlaryň çäklendirilendigini habar berdi.Belawiýanyň Türkmenistandaky şahamçasynda täze ulgama birnäçe günüň içinde 3-4-nji sentýabra çenli geçiljekdigini belläp geçdiler.
Muňa garamazda, bu ýerli awiapetek satuw ulgamynyň aýratynlyklary sebäpli Türkmenistanda awiapetekleriň satuwynda hiç-hili bökdençlik döretmez. Şeýlelikde, 1-nji sentýabrdan Türkmenistana syýahat etmegi meýilleşdirýän ýolagçylar hiç hili kynçylyksyz petekleri satyn alyp biljekdiklerine ynam edip bilerler.
3. Türkmenistan Ýüpek ýoly halkara medeni sergisine esasy hormatly myhman hökmünde gatnaşar. Sergi 6-7-nji sentýabrda Hytaýyň Gansu welaýatynyň Dunhuang şäherinde geçiriler. Türkmenistanyň çeper we medeni-syýahatçylyk önümleriniň görkezilmegine bagyşlanan sergileri guramak we geçirmek işlerini Türkmenistanyň Döwlet medeniýet merkeziniň Döwlet muzeýi amala aşyrar. Serginiň açylyş dabarasyna 1200-den gowrak hytaýly we daşary ýurtly myhmanlaryň gatnaşmagyna garaşylýar.
4.Türkmenistanyň Pakistandaky ilçisi Atajan Möwlamow Pakistanyň federal energiýa ministri Muhammet Aly bilen duşuşdy.Muhammet Aly Pakistanyň ykdysadyýetinde gazyň möhüm ornuna ünsi çekdi.Ol energiýa çeşmelerine bolan islegi sebäpli TOPH ýaly taslamalar işjeň çemeleşmegi talap edýär diýip belledi.
Ministr Pakistanyň TOPH taslamasyna ygrarlydygyny tassyklady.Duşuşykda taraplar TOPH gaz geçiriji taslamasynyň gidişine syn bermek üçin iş toparynyň yzygiderli duşuşyklaryny geçirmek barada ylalaşdylar.
5. Türkmenistan Primorýede bolup geçen harasatdan ejir çeken çagalar üçin Wladiwostoga 35 tonnadan gowrak ynsanperwer kömegini iberdi. Iberilen ýükde egin-eşik, aýakgap, ýorgan-düşek, azyk önümleri we beýleki zerur harytlar bar. Aşgabatdan iberilen ýük IL-76 uçary bilen Wladiwostoga geldi. Harytlar ejir çekenleriň arasynda paýlanmak üçin hünärmenleriň ygtyýaryna berler.
6. Türkmenistanyň Prezidentiniň ýanynda Şahsy pensiýalary bellemek boýunça ýörite topar döredildi. Prezident Serdar Berdimuhamedow Türkmenistanyň öňünde bitiren aýratyn hyzmatlary üçin Türkmenistanyň raýatlaryna şahsy pensiýa bellemegi düzgünleşdirmek maksady bilen, şeýle-de Türkmenistanyň Ilaty durmuş taýdan goramak hakynda kodeksiniň 40-njy maddasyna laýyklykda degişli Karara gol çekdi.
Dünýäde
7.Gazagystan ýokary okuw mekdepleriniň talyplary emeli aňy öwrenip başlarlar degişli okuw sapagy ýurduň ähli ýokary okuw mekdeplerinde giriziler diýip, Gazagystan Respublikasynyň Ylym we ýokary bilim ministri Nurbek Saýasat aýtdy.
Ministriň bellemegine görä, emeli aňyň esaslaryny öwretmek boýunça okuw sapagy Gazagystanyň ýokary okuw mekdeplerinde indiki okuw ýylyndan, belki-de has ir 2024-nji ýylyň ýanwar-fewral aýlaryndan başlar.Gazagystanyň her bir talyby üçin emeli aň hakynda başlangyç bilimleri bilmek hökmany bolmalydyr.
8. Kataryň Taslamalar we miras boýunça ýokary komiteti 2022-nji ýyldaky futbol boýunça dünýä çempionatynda ulanylan 173 tonna mahabat önümlerini gaýtadan işlemek meýilnamasyny yglan etdi. Stadionlarda we beýleki ýerlerde örtük, banner we haýat hökmünde ulanylýan poliester materiallary Saudi Top Plastics kompaniýasy tarapyndan gaýtadan işlenip, plastik bölejikler hökmünde çykarylar.
Sport habarlary
9. Türkmenistanyň çempiony Ahal AFK-nyň Çempionlar ligasy 2023/24-nji möwsüminiň toparçalaýyn tapgyryndaky ilkinji duşuşygyny öz meýdançasynda Saud Arabystanynyň Kubogynyň ýeňijisi Al-Feýha topary bilen geçirer. Bu duşuşyk 19-njy sentýabrda, sişenbe güni Aşgabat stadionynda geçiriler.
10. Awstraliýanyň milli ýygyndysy 2023-nji ýyldaky basketbol boýunça dünýä çempionatynyň açylyş oýnunda Finlýandiýanyň toparyndan üstün çykdy. E toparçadaky toparlaryň arasyndaky oýun 98:72 hasabynda awstraliýalylaryň peýdasyna tamamlandy. Basketbol boýunça dünýä çempionaty 32 sany milli ýygyndynyň gatnaşmagynda 10-njy sentýabra çenli dowam eder. Üç ýer eýesiniň: Indoneziýanyň, Filippinleriň we Ýaponiýanyň çäginde geçiriljek ýaryşda 92 oýun oýnalar.
11. 14 ýaşa çenli ýetginjek oglanlaryň we gyzlaryň arasynda küşt boýunça Türkmenistanyň häzirki çempionlary Mähri Agamyradowa we Gurbanmyrat Rüstemow 23 28-nji awgust aralygynda Moskwada geçirilýän Mihail Moiseýewiç Botwinnik adyndaky halkara küşt ýaryşyna üstünlikli başladylar.
Bäsleşik iki aýlaw ýaryşyny öz içine alýar.Her ýaryşa Türkmenistana, Azerbaýjana, Ermenistana, Belarusa, Gazagystana, Gyrgyzystana, Russiýa, Täjigistana we Özbegistana wekilçilik edýän her ýurtdan 9 türgen gatnaşýar.