Saglygy goraýyş ulgamynda türkmen-german hyzmatdaşlygyny has-da pugtalandyrmak maksadynda, Türkmenistanyň Saglygy goraýyş we derman senagaty ministrligi bilen Germaniýanyň Mýunhen şäherindäki Ýewropa çagalar ýürek merkeziniň arasynda doga ýürek kemisliklerini bejermek boýunça hyzmatdaşlyk etmek hakynda Ylalaşyk baglaşyldy. Bu barada "Watan" habarlar gepleşiginde habar berildi.
Bellenilişi ýaly, bu resminama degişli ugurlarda özara bähbitli işleri amala aşyrmaga uly itergi berer. Şeýle-de doga ýürek kemislikleri bejermek boýunça hyzmatdaşlykda täze gözýetimleri açjak bu ylalaşyga gol çekilmegi Türkmenistan bilen Germaniýa Federatiw Respublikasynyň arasynda ikitaraplaýyn tejribe alyşmak ýörelgesiniň iş ýüzünde amala aşyrylýandygynyň aýdyň güwäsi bolup, resminama täze taryhy döwürde Prezident Serdar Berdimuhamedowyň ýolbaşçylygynda Türkmenistanyň saglygy goraýyş ulgamyny kämilleşdirmäge, dünýä lukmançylyk tejribesinde gazanylan üstünlikleri milli lukmançylyga ornaşdyrmaga, Germaniýa Federatiw Respublikasynyň saglygy goraýyş ulgamy bilen gatnaşyklary mundan beýläk-de giňeltmäge we pugtalandyrmaga gönükdirilendir.