2023-nji ýylyň 10-njy maýynda Türkmenistanyň Birleşen Milletler Guramasynyň ýanyndaky hemişelik wekilhanasy tarapyndan sanly ulgam arkaly Durnukly ulag ulgamynyň dostlary toparynyň ýygnagynyň geçirilmegi meýilleşdirilýär.
Ozal habar berşimiz ýaly, Nikaragua Respublikasy hem Türkmenistanyň başlangyjy bilen 2022-nji ýylyň 6-njy iýulynda döredilen Durnukly ulag ulgamynyň dostlary toparyna goşulandygyny habar berdi.
Toparyň nobatdaky 3-nji ýygnagynda BMG Baş Assambleýasynyň durnukly ulag pudagyndaky anyk teklipleriniň we görkezmeleriniň ýerine ýetirilişi, sebitleriň ulag ulgamlarynda bar bolan meseleler hem-de çözgütler barada pikir alyşlar, ulag syýasaty babatda iň gowy okuw maksatnamalary taýýarlamak, ilkinji giňişleýin gollanmany işläp düzmek ýaly meseleler boýunça maslahatlaşylar. Bu barada Türkmenistanyň BMG-niň ýanyndaky hemişelik wekilhanasy habar berýär.
2022-nji ýylyň 6-njy iýulynda BMG-a agza döwletleriň 90-dan gowrak wekilleriniň gatnaşmagynda Türkmenistanyň BMG-niň ýanyndaky hemişelik wekilhanasy Durnukly ulag boýunça dostlar toparyny döretmek we onuň wezipeleri boýunça maslahat geçirdi. Şol wagt bu Topara 11 döwletiň goşulýandygy hasaba alnypdy.
Bu topar, BMG-ä agza döwletleriň resmi däl birleşmesi bolup, durnukly ulag ulgamynyň ähmiýetine düşünmekligi, dünýä, sebit we milli derejede bu ugurdaky pikirleri hem-de öňdebaryjy tejribäni paýlaşmagy maksat edinýär.