30-njy iýunda Türkmenistanyň Nebitgaz toplumynyň Merkezi binasynda Türkmennebit döwlet konserni Dragon Oil (Turkmenistan) Ltd. kompaniýasy bilen Önümi paýlaşmak hakynda ylalaşygyň möhletini 2035-nji ýylyň 1-nji maýyna çenli uzaltmak hakynda şertnama gol çekdiler. Bu barada Nebit-Gaz gazetiniň elektron neşiri habar berýär.
Önümi paýlaşmak hakynda ylalaşygyň esasynda geljek 10 ýylyň dowamynda Hazar deňziniň türkmen ýalpaklygyny, hususan-da, Çeleken şertnamalaýyn çäginde ýataklary özleşdirmek boýunça işleri çaltlandyrmak göz öňünde tutulýar.Häzir bu ÖPY-niň çäklerinde Jeýtun we Jygalybeg nebitgaz ýataklaryny işläp taýýarlamak Dragon Oil kompaniýasynyň esasy işi bolup durýar, bu ýerde kompaniýa 2000-nji ýylyň maýyndan bäri işleýär hem-de şu döwrüň içinde ABŞ-nyň 8 milliard dollaryndan gowrak maýa goýdy.
Ozal Dragon Oil (Turkmenistan) Ltd.kompaniýasy bilen Önümi paýlaşmak hakynda ylalaşyga 2000-nji ýylyň 1-nji maýynda 25 ýyl möhlet bilen gol çekilipdi, onuň möhleti 2025-nji ýylyň 1-nji maýynda tamamlanýar.