11-nji aprelde, BMG-nyň Ženewadaky edarasynda brinfing bolup, onuň dowamynda adam hukuklaryny goraýan “Türkmen inisiatiwasy” toparynyň, Adam hukuklary boýunça halkara hyzmatdaşlygynyň we adam hukuklaryny goraýan “Human Rights Watch” guramasynyň bilelikde taýýarlan hasabatlary, şeýle-de hasabata rezýumeleri ýaýradyldy.
Hasabat BMG-nyň ählumumy döwürleýin syny prosedurasy esasynda taýýarlandy. BMG-na agza hökümetler dört ýylda bir gezek öz ýurtlarynda adam hukuklarynyň umumy ýagdaýy hakynda hasabat berýärler, jemgyýetçilik guramalary bolsa, alternatiw hasabatlary taýýarlaýarlar.
Hasabatyň iňlis dilindäki rezýumesi bilen şu ýerden tanşyp bilersiňiz: TM UPR summary final March 2018 .
Onda Türkmenistanyň hökümetiniň mundan öňki döwürleýin hasabaty (2013-nji ýylda) wagtynda berlen esasy rekomendasiýalary ýerine ýetirmändigi aýdylýar. Pikir aýtmak azatlygy, hereket azatlygy, mejbury göçüriş zerarly degerli kompensasiýa almak we beýleki esasy hukuklaryň bozulmagy dowam etdirilýär.
BMG-nyň wekilleri bu synyň dowamynda Türkmenistanyň resmi wekillerine anyk sowallary berýärler.