Tükmenistanyň Senagatçylar we telekeçiler birleşmesiniň başlygy Nökerguly Atagulyýewiň ýolbaşçylygyndaky türkmen işewür wekiliýeti 2024-nji ýylyň 4-nji maýynda Türkmenistan bilen Owganystanyň arasyndaky söwda gatnaşyklary ýokarlandyrmak meselelerini ara alyp maslahatlaşmak maksady bilen Owganystanyň Hyrat şäherine sapar amala aşyrdy.
Türkmenistanyň Owganystandaky Ilçihanasynyň habar bermegine görä, saparyň dowamynda türkmen wekiliýeti Hyrat şäheriniň gubernatory Nur Ahmad Islamjar bilen duşuşyk geçirdi.
Şeýle hem türkmen wekiliýeti Hyrat welaýatynyň senagat zolagyndaky mermer daşlary gaýtadan işleýän zawodlara baryp gördi.
“Türkmendemirýollary” agentliginiň habar bermegine görä, Hyrat şäheriniň gubernatory häzirki wagtda Hyratda bir müňe golaý zawodyň bardygyny we welaýatda ähli önümleriň hususy pudak tarapyndan öndürilýändigini belledi.
Şu ýylyň 26-njy aprelinde Kabulda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýewiň we Owganystanyň söwda-senagat ministri Nuriddin Aziziniň ýolbaşçylygynda geçirilen türkmen-owgan gepleşiklerinde Turgundy şäherinde Bilelikdäki logistika merkezini döretmek meseleleri ara alnyp maslahatlaşyldy.