Türkmenistan bilen Malaýziýa hyzmatdaşlygy çuňlaşdyrmak üçin bilelikdäki topary döretmek bilen ikitaraplaýyn gatnaşyklary täze derejä çykarmagy maksat edinýärler. Bu barada Malaýziýanyň Premýer-ministri Datuk Seri Anwar Ibragim iki günlük resmi saparda bolýan Türkmenistanyň Prezidenti Serdar Berdimuhamedow bilen bolan metbugat-maslahatynda mälim etdi.
A.Ibragim iki ýurduň daşary syýasat edaralarynyň ýolbaşçylary bu başlangyjy eýýäm geljek ýylyň başyndan durmuşa geçirmäge girişerler. “Iki döwlet hem bilelikdäki topary döretmek arkaly hyzmatdaşlygyň derejesini ýokarlandyrmagy maksat edinýärler. Daşary işler ministrler geljek ýylyň başyndan bu taslamalaryň üstünde işläp başlarlar” diýip, Premýer-ministr aýtdy.
Ol Merkezi Aziýa iş alyp barýan Malaýziýanyň “PETRONAS Carigali Sdn Bhd” işine goldaw berýändigi üçin Türkmenistanyň Hökümetine hoşallyk bildirip, Serdar Berdimuhamedowyň ösüş meselelerine çemeleşmelerine ýokary baha berdi. “Türkmenistanyň Prezidentiniň diňe bir söwda-ykdysady gatnaşyklary ösdürmäge däl, eýsem, ösüş meselelerine, şol sanda medeniýet ulgamyna hemmetaraplaýyn çemeleşmesi, şeýle hem biziň doly goldaýan halkara parahatçylygyna ygrarlydygy mende aýratyn täsirleri galdyrdy” diýip, A.Ibragim aýtdy.
Türkmenistanyň Prezidenti Serdar Berdimuhamedow gazanylan ylalaşyklaryň dürli ugurlarda hyzmatdaşlygy mundan beýläk-de çuňlaşdyrmak üçin möhüm binýady emele getirjekdigini nygtady. “Biz Malaýziýa saparymyzyň netijelerine ýokary baha berýäris. Onuň çäklerinde gol çekilen ylalaşyklar ikitaraplaýyn gatnaşyklarymyzy, hususan-da, söwda, ykdysadyýet, medeniýet we ynsanperwer ulgamlardaky hyzmatdaşlygymyzy berkitmäge ýardam eder” diýip, Türkmenistanyň döwlet Baştutany aýtdy.
Iki ýurduň arasyndaky diplomatik gatnaşyklar 1992-nji ýylda ýola goýuldy. Şu gezekki saparyň barşynda öňe sürlen başlangyçlar iki ýurduň Baştutanlarynyň hyzmatdaşlygy pugtalandyrmak babatda tagalla edýändiklerini tassyklaýar. Olar ýokary bilim we syýahatçylyk ulgamlarynda gol çekilen ylalaşyklaryň hem-de bilelikdäki toparyň döredilmeginiň özara hyzmatdaşlygy täze derejä çykarmaga mümkinçilik berip, iki ýurduň hem durnukly ösüşine ýardam eder.