Türkmenistan Birleşen Arap Emirlikleri bilen köptaraplaýyn hyzmatdaşlygyň çäklerinde sport babatyndaky hyzmatdaşlygy hem has berkider. Dostlukly döwletiň Türkmenistandaky Adatdan daşary we Doly ygtyýarly ilçisi Ahmed Al Hameliniň Türkmenistanyň Bedenterbiýe we sport baradaky döwlet komitetiniň ýolbaşçylary bilen geçiren gepleşiklerinde bu hyzmatdaşlygyň geljegi barada takyk wezipeler goýuldy.
Duşuşyga türkmen tarapyndan komitetiň başlygynyň orunbasary Serdar Ataýew we halkara gatnaşyklary bölüminiň müdiri Şamyrat Seräýew gatnaşdy.
Taraplar iki döwletiň arasynda uzak ýyllara daýanýan sport hyzmatdaşlygyny geljekde has ýokary netijelere çykarmagy meýilleşdirýärler. Şunda türgenleriň we tälimçileriň alyş-çalşygy, sport desgalarynyň gurluşygy we olaryň dolandyrylyşy ýaly meselelere aýratyn orun berler ― diýip, ilçihananyň jemgyýetçilik torlaryndaky hasabyndan habar berilýär.